新租客

最近，其中一間物業又交番屋樓比我，有時有D野真係好邪，唔到你唔信，你以為間樓質素差咩，偏偏租客就係咁住。反而呢間我以為質素好咩，又真係一年一個租客，真係比代理錢都比得唔抵。


而最衰的係佢9月10日比番間屋我，如果早一兩個月係暑假旺季，咁我都唔太怕租，奈何一入9月，本身搵樓換樓的人又停晒，再加埋個股市有如食屎咁，我都知道要搵個租客，又或者好租客，又或者係好的價錢，都應該係好難。始終無天時的情況下，要租出又好租，真係撞客。


由於我8月已經settle晒其他3間樓的事情，包括轉按同出租，手上的資金其實都比較充裕，老實講就算一個月唔出租都無乜問題，不過當然長期空置就打死都唔劑啦。如是姐，我就一如以往咁放晒比全條街的agent，但經過左一個weekend，电話連響都無響過，到下一個星期，先得兩三枱客，我就知道個市好弱。


於是，與其守豬待兔，倒不如主動出擊，我又衰衰地咁自己放上網，當然我自己放由於無agency fee就可以平過比放agent的價啦，經過左幾日，都係得3-4台客，於是我就約佢地睇樓，而第一個上黎睇的，係一個疑似靚模的女仔。其實老實講，我覺得佢似黎玩多過黎睇樓，而且我講左話呢間屋唔會擺得耐，所以最好係要有能決定的心先至好上黎。不過其實佢決唔決定都係咁話，見到佢我的直覺係呢D女仔都唔駛租，你問佢做咩佢就話自己做marketing，其實好大機會係似做倫敦金的人，之后晚晚喜愛夜蒲。佢話就話兩個人住，但我感覺佢係呢個位又欲言又止，令我感覺佢係有個金主係背后，點都好，我諗唔到佢的收入係幾多同穏唔穏定，作為一盤生意黎講，風險好大。而作為一個男人黎講，佢係有小小撈味得黎又唔靚，有點不安，所以就算佢反而最後又有興趣，我都無租比佢。


而真正的租客比我想像中更快出現，主角係一對男女，都係80後吧。睇样就似係小小老實人，傾計都算係老實得黎，但又好似有小小唔知點講，總之會有小小好似要懷疑佢係咪堅的感覺。不過佢地勝在爽快，而且會講價得黎又唔太過份，我認為講小小價係一件好事，因為太爽快easy先會令我不安。但正正又因為佢地講少少價就OK，我諗住入直路之際，其實又有一段小插曲。


在我而言，佢地係第二個我搵的客，但又正正係最後一個我約上黎的客。老實講，我都唔想再花太多時間去傾，只要大家岩就拿拿臨。不過問題係，佢地係比錢果一下其實都有令我覺得有問號的地方，始終兩個80後，兩個都有正職，但係決定租的一刻，兩個人加埋，去銀行都比唔到兩上一下比我，其實真係有小小後悔。老實講，乜野人點解幾皮野都無係身但會走去諗租樓？當然個男的原因話份糧未過數，之但係講堅幾皮野真係唔係話好多，但兩個人加埋都係得皮零野，我堅有小小驚之後的租金。


底線其實係講真呢排D錢稍叫鬆動，要遇著咩事我都有足夠的資金有突去玩，所以有本錢搏都OK，而且，隊長我真係想盡快起租唔想再拖拉所以都有心搏。因此，我收左一份錢之後都照交鎖匙比佢地先，限定要3日內交足錢先租約生效，呢個決定其實都係有風險，不過有時做人都要賭一賭講信字，我傾向相信香港比較多的都係老實人，但小心D當然都係好。無論係點，呢家都叫收足錢搞掂左件事，看來今年的租樓野應該告一段落。


係我起租後幾日，市場唔知又係咪凍左太耐，好明顯我電話又多番。不過，樓已租出，無計。但見到唔係太靜，都係一個比較正面的Signal。