美國人經濟狀態

最近了解到兩位美國生活的人的生活狀態，在很多時候看到鬼佬好似行出黎就有米同風光的背后，實際有好多時可能情況都唔係我地所能想像的。


歸納兩位朋友的情況，大致一個美個人係有三样野為最主要的開銷，第一样就係個人的入息稅，一般就係30-39%左右，睇你收入係幾多；第二就係醫療保險，當然有貴有平，但平極都可能5000美金起一年，貴的就15000美金起一年，但有工作的人可能公司會有補助，出一半或全數補貼都有可能；而最后一舊就係住屋的相關支出，而同住任何地方都一样，可以分為買樓同租樓的支出。


當然係香港人的眼中，始終都係買樓會好點，因為中國人的概念係有土斯有財，亦要有根，而且仲要係幫人供樓不如自己買樓等等。係美國買樓，其實真係好適合香港上唔到車的人去諗，但講呢样野的原因並唔係因為美國適合買樓，相反只係因為美國地大人口無咁集中，你要貴的靚的又有，要平的住遠D亦唔會太差，像我兩位朋友，A住正係通往New York的要道上，樓價就會偏貴，而另一位B側住係比較偏遠的Small Town，位置雖遠但環境清悠，兩個人住的地方條件其實都唔差，但價錢其實都差3倍，可謂豐歛由人，所以美國人要上車都真係唔難。


不過講番美國人的支出呢下，買樓其實除左樓價外，背后的相關開支都真係幾勁。舉個例，朋友A的樓價約600K美元 ，但地稅一年要15000元，計一計真係成皮野一個月。而朋友B的樓價約為250K美元，因為係小區的house，管理費側為200美元一個月，地稅就一年6000元左右，即成年計約莫9000元左右，而如果朋友B間屋租出去側可有預期收入1800元，表面租金回報好似幾理想有8.64%，但其實扣除地稅同埋管理費，就得番5%左右。而係美國買樓同香港唔同，因為香好多high rise，大家睇住成交價好易估，但係美國間間屋都講真唔同，有時好難肯定個成交價，而且其實成交都唔係好多，所以如果想用香港人的口味去諗，其實唔係好得，因為美國樓升10%-20%已經幾可觀，但香港人堅睇唔起呢個回報。


以上講到支出的話，其實買樓果度係仲未計mortgage，即如果你唔係full paid的話，其實當然仲要考慮供樓又要比地稅，所以隨時都幾襟計。回想下假如一個美國人佢年收入約100,000美金，交完稅已經得番61000美元左右，然后當公司補一半保險，即當佢比7500元，咁就得番53500元。而如果佢係要買層500000的樓，當佢7成供20年@3%，每月供1941美元，一年就23292元，當23000，再扣埋約莫12000元的地稅，實際就要比35000元一年，即得番18500元一年。兌番港紙黎講，即係一年780000元，大約得番144300一年可以洗，即每月12000蚊左右。


老老賓賓，計到呢度，其實有好多美國佬都係表面風光實際月月清。當然如果兩個人去搵錢就會好少少，但生活係香港的我地，可以不防用美國的狀態黎借鏡，一方面稅率真係堅低，我地比少人地60%的薪俸稅，而且地稅又係低，我地成年加埋都係幾千蚊，但人地係講緊十皮八皮。只係呢兩度，你都可以明白點解香港樓價會咁貴，因為香港人可以用的錢係比人地多，而買樓的成本，特別係收租回報，其實都高。


了解完之后，本來有興趣係海外投資的我，都差唔多唔會諗美國，特別係人又唔係果度，回報又唔係高，remote咁控制成本又高。講完一輪，結論係美國佬好多都表面風光其實月月清，而另一方面係回報實在不合胃口，句號。