消費和投資

每一次見到Facebook的年輕朋友開開心心咁去旅行，不然就諗起而家D人話買樓好難，收入好低，機會好少，壓力好大，所以要去旅行啊濕平啊咁去減壓。


某程度上我都認同以上某些觀點，比如話對於后生仔買樓真係好難，剛畢業收入又真係好低，機會就唔係太多啦（不過都有），壓力大又係真的，呢個的確係現實社會的現象。之不過，正正係咪因為咁，就應該思考下點样去戰勝呢個現實，而唔係只管投訴然后卻和所謂的解決方案越黎越遠呢？


年輕無價，我都承認后生多幾年的話我一样會Fing錢去玩去消費，不過問題其實都係在於你洗得起同值唔值。如果一個無乜計劃的人，搵兩皮洗三皮就當然死得，但有D人仲可能好型咁話我搵兩皮食歺千零二千蚊好野，都應該叫做食得起掛？老實說，一歺半歺無問題，不過如果样样野都係一千幾百之後，你每個月都係剩唔到幾多錢，咁就講真你要諗下你係咪唔係洗得起？


好多時我地諗野係話我搵咁多當然要食好D著好D，自自然然上台就用最貴的套歺，食野就下下三五百落樓，飲野又不在話下，著件衫行入IT又係四五百蚊一件等等。每样野單一黎講的確係洗得起，但全部野加加埋埋就係一個消費模式，而呢個消費模式原來係令你的生活變月光族或接近月光族，咁你就真係洗唔起了。


可能你會話，儲錢有柒用咩，呢家都買唔到樓，小小錢又唔知做咩，買股票隨時仲晒埋佢等等。你說得其實亦很正確，小小錢的確無乜用，而唔小心仲輸埋股票就更加冤枉，所以呢度係兩個層次的問題，一就係你儲唔儲到舊錢出黎，而之后先再講你投資做咩。


其實換個角度，我假設一個畢業生如果正正常常無咩問題，做十年野係香港大約搵到3萬元月入應該問題不大。拉上補下咁攞個約數，當平均有2萬一個月，即十年黎講大約總收入約莫係240萬左右，當然有D人叻仔D有D人渣D，仲要唔計Bonus同double paid當offset左個稅，即一個年青人到你32歲左右，會有大約一共240萬的錢經過你手。每個月出糧比你七除八扣就看似唔多，但如果一炮比240萬你，應該都唔算細數，而隊長的問題係一炮比你又好，你又會點样分配呢舊錢去洗呢？


可能你個腦會轉係話幾多幾多錢家用，幾多幾多錢係消費等等，咁我就可以話比你聽未必係最好的出路，因為如果你識玩，我假設你做最無聊而又相對已經好鬼安全的投資，就係買隻中電收約7%的股息咁講，你已經可以收到約168,000一年，即平均每月14000元左右。你如果識用咁的思路去諗，咁你就會發現條數好計好多，因為你如果就住14000元筆直去洗費，你會發現你係無L敵，因為年年都準時有糧出，而你舊錢240萬又仲係未郁過，32歲有如此財力的話其實往后都會幾輕鬆。


當然你立刻可能會話現實黎講唔通又唔洗食唔駛洗咩？你岩，當然唔得啦。而且每個人際遇都唔同tim，有Ｄ人可能搵極都係萬零，有Ｄ人就三兩年就搵四五皮，邊有得講？不過個point係你搵萬零又好，四五皮又好，你識唔識得點样令自已越做越輕鬆之嘛。比你搵四五皮但你月月清，對比起人地搵萬零但儲到每月一萬，每年儲再加埋7%的複息效應，一年十二萬再賺8400，十年落黎就大約有177萬，每年已經可以收約12萬左右的收入，即每月額外每月袋多一萬了。


要達到呢個目的有三個主要因素，一就係你儲唔儲到錢，可否控制自已平均消費，二就係你有無紀律持之以恆去做，三就係你識唔識呢個方法同工具去減輕將來的生活壓力。我所講的方法其實基本上人人都做到，問題只係你做定唔做而已。所以回到文章開頭之時，如果你目標係每月儲一萬的話，你初初畢業其實有好多野應該都係買不起才對，如果你叻仔的話其實過三幾年人工花紅都有進展時，儲一萬變得輕鬆，那時也許才是放鬆小小去享受生活的時間。


但如果，你由頭都尾都唔識唔知點行的話，咁只有希望你工作能力同回報都超強，又或你屋企有父幹可幫你，否則如果你始終認為社會太殘酷的話，其實可能只係你唔識點玩，而唔係社會隊冧你。有時就係果一點點知識，人生就可以好唔一样。