希臘股災

由希臘公投以超過六成人不接受削減開支政策，歐元區恐怕將進入新一輪的爆煲事件，因此股市亦先行，全球股市狂跌，A股由5000點跌到呢家3530點左右，恆指亦由26500左右一路直插至24000點樓下，每日一千幾百點咁跌，真係輸死好多人，特別係玩牛仔的或是孖展的，輸追孖展已經係埋單，升番都無用。


點解會有今次大跌的情況，就要講下希臘公投背後的意義。其實希臘本身個經濟實體唔大，本身就無乜大問題，不過如果佢係可以賴債，即係話歐元區其他高債的國家都可以，而與此同時歐元區本身的債務都係環環相扣，如果希臘唔還錢，大家都唔敢講會唔會火燒連環船咁隊爆下一個弱勢的交易對手，即可能係西班牙意大利咁講，如果隊爆埋西班牙意大利，咁就可能引發其他本身無乜事的國家，如果連瑞典呢D健康二線國家都出埋事，咁法國同德國都玩完，歐元區就可能會解体，呢個就好似金融海嘯時期的情況，所以資金要避險都係正常的。


話說回來其實之前股市大升，有好幾位股齡較淺的朋友突然大談股經，二十出頭就大舉入市的絕對為數不少。本身有實力的朋友玩股其實無可厚非，反正自已知自已有穏定收入有資產等等，考下眼光絕無問題，但係岩岩出黎甚至仲未工作的人就在股市裡頭玩身家，呢样野其實係有點過份。事實上我有提出過升市時賺錢好易，但心紅了就可以一鋪清袋，股市專收叻仔呢样野，唔單止係你，隊長自認叻仔其實都老早投左降。重申一句，玩股其實小注怡情係好的，但無經驗玩身家就瘋狂入市，市好時造就無數少年股神，但市況一轉其實可以造就一鋪清袋甚至欠債破產，歷史總是不停重演，多少少年股神或全職炒股的人其實已經被收皮無數回，但人總是沒吸取教訓。


其實有部份朋友今次都食得好傷，我都替佢地難過，不過慶幸係好多我這年紀的人都底子較厚，輸當然唔過癮，但應該都在可控笵圍。


而樓市其實會唔會被沖擊，目前黎講隊長認為都係言之尚早。首先一個關鍵就係希臘件事拖幾耐都埋幾時埋單。就最新消息係指希臘撤換左財長去交一個可行性的方案比歐央行，如果可以解決事件的話當然就好，不過講真係應該無可能，始終民眾講明唔減得福利，希臘點样可以係唔大減開支下做到收支平衡甚至有盈利還錢，基本上無可能。所以今次隊長個人認為係一個借口比歐元區殺一警百，不過就會破壞左德法兩個堅持歐元一体化的理念。


如果我係德法兩個元首，我就會同希臘埋單，踼佢出歐元區止血，但同時再加碼QE力度，補充其他受影響的國家的財務狀態，以防火燒連環船。希臘如果退出歐元區，相信即刻會泥足深陷，新貨幣將會急促貶值，而且無法還債，交易對手將會發現希臘人無法支付而唔再供應野，即日用品食品可能係下一步出現問題，然后希臘就會將自已送番一個第三世界國家，人民都係無辦法拥有以前的福利，其實一样仆街。但係呢個影像，係話比其他歐元區國家聽，佢地留係歐元區係有國家穩定的原素，一但破產自已收皮，后果就不堪設想。


如果以上的大膽假設係成立，咁即係話歐洲將會有新一輪的大規模QE，而美國可能都因為咁減慢加息，而我地係世界另一面似是穩健的亞洲區其實將會係資金避險的天堂，唔好講話資令香港或亞洲幾咁經濟繁榮，只係話抗跌力比歐洲強已經係合理預期。所以如果係有新QE並同變成資金避險地區，港樓應該受影響將會輕微甚至可能無反應。京就只係京大陸股市繼續爆煲而已。