家人愛你變害你

最近身邊的朋友都出現以下各類似的情況，令隊長覺得有時屋企人愛你真係反而害左你。


朋友X的故事就比較簡單，好多年前佢爸爸送左間唐樓比佢，呢件事發生係佢連買樓都未知係咩事的時期，可能大約18-19歲左右吧，到而家自已買樓幾年后想換大樓，就搞黎搞去都避唔走個DSD，之但係最大問題係層唐樓佢只係代家族持有，無實際收益時，呢家賣完自住想換三房，點都係要輸DSD，想加按又無法做二按，卡住係呢個枝節位。


朋友Ｙ的故事亦比較常見，話說好多年前屋企人買樓一人出一份，自不然人人都落名做保障，到今時今日大家都大個仔女自已出黎住，人生最大舊資產就鎖左係果層樓度，要賣又唔係一人可話事賣到，自已買又要輸DSD無二按，最慘的就係佢果份最大，但家人的睇法係祖屋咁劑，所以又唔賣得，再加上其實供款一直都係佢自已出，正所謂有投資就無權益就等於呢隻咁劑，如果夾硬賣就家變都有份，呢個又係一個大難題。


朋友Z都係差唔多，阿公走左之后買左層樓比阿婆住，住住下就D親戚都住埋入去，租就無得收，供就有份供，一住下來十年八載，一代傳一代，你又唔好意思呢家去收租，但層樓又唔會賣得，真係有同無都無乜分別。


以上例子，最大的問題係好多時買樓前的目標並沒有很清晣，亦沒有很長遠的計劃，再加上政府的辣招，頓時成個計劃就企晒係度。你可能仲會話其實有咩問題? 有樓都總叫好過無樓，有資產都總叫好過無資產掛？


呢件事的問題係，你唔能夠掌控你的資金自由，特別係個障礙並唔係講投資，而係講其他唔係錢相關的事情，特別係上面的野一層跟一層，你郁親都會影響到你D阿爸阿媽姨媽姑姐的話，咁你就會發現有好大的阻力去行動，特別最大的問題係佢地可能都唔識點样做。


中國人根深蒂固的家入面，係要有一層樓的家的觀念，因此如果你要做任何野影響到可能會無左層樓的，亦即係無左個家，呢個係一件好大Ｌ穫的事。舉個例，你同阿爸阿媽講兄弟姐妹都長大搬家了，不如賣左層樓搬細Ｄ然后再套錢黎投資，佢地的諗法一定唔會係諗個錢，反而係家的存在問題。當然我都唔係好讚成賣左你老豆老母親樓，的而且確有D野唔係剩係用錢諗，之但係又一個問題係如果層樓你有份，咁就濕濟，即係唔駛賣都似。


而另一方面最常見的野就係你同屋企人講咩一開二二開四，好多上一輩的屋企人會覺得太不可思議地希望你唔好亂黎，亦盡可能唔會支持你費時搞出個大頭佛。係呢度我都先講隊長呢一刻都唔鼓勵你太進取，那怕其實政府把左關去收緊按揭都好。但議事論事，我聽過好多媽媽聽到個仔買一層樓都已經擔心到不得了，怕個"傻仔"計錯數到時一身債，自已年老又無力幫忙就大件事。當然呢個擔心一方面係來自於母性的愛護，但同時亦出自已於時代改變下的"唔識"。


上一輩人講買樓，可能係人生中最大的一件事，特別係70-80年代香港都係起步同轉型中，好多人叻Ｄ的都只係買到一層樓就自住，直至90年代先開始興炒下樓，但果Ｄ係後話。上一輩人黎講，人生人就只買過一兩層樓，仲要係捱得好辛苦。今時今日時代進步了，買樓雖然都係難，但識玩的人，同有能力的人，其實買樓並非咁遙不可及。加上而家金融的資訊當道，槓杆下玩的野五花八門乜都有，種係呢一代人的投資DNA，早已經超越上一輩（但唔代表投資一定叻過上一輩）。所以，係兩代人的資訊教育思維的不對等下，你的資產如果要受到屋企人的長輩去制衡，自不然就會相對保守，甚至變成絕對保守。



可能你都唔覺得係咩問題，其實隊長都唔可以話係一個問題，因為如果你根本唔諗住講咩財務自由，只係老老實實打份工，是無問題的。不過，如果你稍稍有D貪心同擔心將來的話，咁你要展步時，比你明白到買樓一開二二開四係一個遊戲的玩去，但屋企人卻唔係在同一條線上，到你能展步時可能已經差了幾百萬的差距。