資格

一段時間之前，隊長我八八掛掛微服出巡，參加左一個上車班。當然好明顯，上車早就已經唔係我要關心的問題，不過去參加下呢Ｄ班，了解下教的人的質素，以及參加者的人數同實力，其實對於了解整個市場運作同需求都係有一定的感覺。


成個班大約係一整個下午，講真我都有小小佩服點解可以講咁耐，先唔好講內容，就係叫是但一個人出黎講幾粒鐘野都真係幾鬼攰。不過頭兩個鐘我可以講係同樓市基本上無乜關係，有小小好似想洗腦式咁講話要識人識團隊而一齊發達，然后又自已互相介紹下咁，理念上係好的，不過又好似有小小多餘，點都好其實差唔多有一半時間可以話係同樓無關。


下半場就開始有個隊長我幾欣賞的遊戲環節，主要就係講買樓賣樓同番工之間的關係，設計係點就廢事講人地的商業秘密，不過有一兩個位我睇到都唔係咁合理，之不過遊戲就遊戲，亦無需太執著，主菜就係遊戲完后大家分享自已的"成功"秘訣，咁样就差唔多過左3/4時間。去到差唔多最后，就小小講關於樓市的所謂分析，老實講呢Part打落先開始見到呢班人的功架，亦證明原來有時真係唔駛好叻都可以教人，只要你夠勇敢行出黎就得。


湯文亮之前有講過話其中一個留言的人得果六層樓就係度也文也武，連挽鞋的資格都沒有。如果套落去呢一班人度，我就更加唔識講，因為主講的老師話自已買賣過幾個物業，不過係香港就只係買賣過一間，仲要係幾年前買，買的時候平左唔知幾多%，然后係一兩年前賣左，就執左80萬咁。正當好一班綿羊聽得如痴如醉覺得老師賺左幾多幾多錢的時候，我個腦只係出現，唔係嘛，咁都得？


聰明的你可能會睇到同我一样睇到的野，不過可能同學仔大部份都係未上過車唔了解，甚至係黎"做妹"，所以無人會提出問號，不過好明顯有兩個問題係如果老師係專家，咁你教人買樓時你賣春晒d樓，咁你學乜鬼野人教人？好啦，就當你賣晒係因為你覺得見頂TIP到好準，咁但係你一兩年前賣左執80萬，咁點解唔講下呢家如果唔賣你係咪執160，賺少左一倍啊？錯的timing出左貨變空倉，得一層港樓就教人，呢下我真係有小小京左。


其實係教的時間，我感覺得呢位所謂的老師都好似係帶點熱誠，個人都無乜野係D實力同經驗唔太夠班，不過仲有一個位係佢自已講自已的賺錢史時唔係太老實而扣分，就係佢係要比10% SSD而無寫出黎的。實際日期我唔記得，不過都幾肯定係因為隊長寫過20121026呢個３年版SSD的日子，所以隊長好記得佢買的日子係呢個時間之后，而出貨日期當然就係未過３年啦（我寫呢篇文都未過３年），所以佢一定要輸起碼10%，而記憶中我記得佢係扣完SSD係應該執40-50萬左右最多，呢一下唔老實我就覺得扣誠實分之餘，仲扣埋實力分。講真，買層細價樓賺唔到100萬其實都真係完全唔值得攞出黎講，呢家仲要攞黎當料黎sell，不過竟然仲有好多人Buy....真係啤一聲。



臨近尾聲，老師就又叫左其他果Ｄ隊員出黎分享下上車的能力，大家就不停講話自已買平左估價幾多幾多%之頪咁，然后又讚話要多謝自已的隊員有幾幫手幾咁叻叻。講真如果買單幢樓仲要殘裝，好多時買平估價係好容易的事，殘裝買平10-20%有乜咁出奇，有時唔係講緊個銀行估價，要compare就compare番D成交先實際，舉個例，銀行估個單位400萬，你用350萬買以為好平，但點知你樓上一個月前賣330萬，你樓下兩星期前賣320萬，你可以話全部人都買得平，但實際你果間可能已經係創新高，有咩值得慶祝？


樓市入面搵銀其實大家百花齊放都無乜問題，只不過係話老師同教的團隊實力咁粗疏，呢下隊長就唔係太認同，因為最怕就係自已唔識就教錯人就無謂。粗疏的表現其實來自於好幾面，一方面就係所謂的數據分析完全係流於表面到等同無，如果要學野不防睇下PP的大作，求其一篇都可以比起呢個班的所有數據加埋總和都仲有剩，而且分析係零，數據來源係零，真係果Part可以話大扣分。而政策同策略方面又唔全面，唔講政策點買樓，又預視唔到上車后點样一開二二開三四五六七，只係講話上車行一步，咁都仲有人Buy我覺得好神奇，我諗求其行落一間地產鋪搵個agent問都學多野過佢。而最后就係實際操盤，無人有多於一層樓都已經好京京，仲要係咁早走貨輸埋10% SSD比政府，咁都出黎教真係嚇鬼死我。


個人認為，呢一班人可能連地產Blog都唔係好睇，所以佢地唔係好知地產大師如財叔啊KC之類的人，又或者唔睇下PP的大作吸收下小小知識放係個課堂入面都好。佢地的方向可能真係唔係講地產，只係要Tum到一班傻仔去上堂開Course賺錢就算，與其係咁，咁我覺得坊間實在有太多選擇會完勝呢一班人仕。但係又啤一聲的係，真係你有你做，佢有佢Sell，一样會有人落撘，市場資訊唔透明下真係乜都有可能。


最後雖然隊長似是柴台，但隊長認為呢一班人都係有熱誠之仕，只係如果堅有人踩場的話，我諗佢地真係未Ready招架。呢個世界好大，當然你唔駛下下幾百億身家先教人，當然你有幾百億身家都未必會教人，不過老實講就我個Blog的讀者，係咁易有三幾間樓的人無一千都應該有幾百，是但一個都可以踩場完勝老師。欠缺說服力係一，教唔到人係二，如果之后仲教錯人的話，其實就真係唔係一件好事。