沒有年青人的樓市


同朋友講起樓市,其實呢家真係發現一件幾恐怖的事,就係無講開買樓的,繼續唔講買樓,講買樓的,就大部份仍然未買到樓。唔係講笑,去到隊長呢個80頭年紀的人,以我身邊的朋輩黎講,未買樓未上車的人,係佔多數的,而再向下5年黎講,就更加明顯,雖然你可以話不嬲都係人越大先會較大機會買樓,不過我相信以目前黎講,如果有數字的話,我相信無樓的30歲人比例,對比歷史任何一個時段都高,而且似有惡化同老化的趨勢,樓價再升的話可能40歲無樓的人都會越來越多。


前幾日同其中一個朋友傾開,佢不嬲對投資無乜概念,之前成日就想搞生意。當然我好慶幸佢無一時之氣亂做生意,而佢亦順勢同我講小小樓市。以佢對樓市零概念黎講,我舉左一個比較容易明白的例子,就係假設全香港有100個物業,其實有90間都已經比正常要住的香港人用家買左住緊唔會賣,而剩番落黎係有10間比你地D人買黎投資啊炒啊上車咁的。不過呢家最大的問題係對於呢10間屋,其實可能有9間至9間半,都比人買左黎做長線收租死楂唔放,所以呢家講話上車好咩都好,大約就係靠每年新增由地產商起的1間屋去比人分,咁你話夠唔夠分就好明顯,除時仲有投資者食多你半間,貨源歸邊下年青人想上車,其本上唔會有可能。


講到供應短缺,相信大家都可以拋出一大堆原因,咩地產霸權,官商勾結,地產商玩野,政府無地,人手不足,前朝勾地問題,環保地區意識等等,而再推到樓價飛升,除左供應短缺之外,跟住又講D人炒高晒啊,QE啊通漲啊,貨幤戰爭等等,反正唔係經濟專家都可以比到一堆好似好Pro的解釋比你。不過其實比你講到識飛,世事都被你看透了又有柒用?到最后只有一样野係重要,就係有無認清事實順住個勢去走而已,呢個先係關鍵。


簡單黎講,我比你知道問題,但你有解決方法咩?連奧巴馬同習近平都要去QE印錢,CY林鄭同波叔都搵唔到新地出黎,你自已不防諗下你係邊位可以去改變世界?年輕人有理想係好,不過生存左咁耐我相信有番小小經驗的人都知,呢個世界其實真係好難改變的,所以如果你要花十年二十年時間去抗爭的話,點解唔反而用同样時間去跟住個遊戲玩而去贏個遊戲呢?政治上我認為係要爭取一些理念的,所以我所指的只係財務上,話明比你聽個現實係咁,就係樓少,樓價就係被夾升,就當佢有地產霸權,點解永遠都迫自已做無產階級,而唔去試下諗方法變有產階級呢?


有時我覺得好怪,我係度諗究竟一個人諗方法儲錢同賺首期難D,定係要求政府折村收地環評再招標再限制地產佬平賣再解決工人不足問題而再解決你都係無/唔夠首期的問題難D?其實問題都顯而易見,不過唔知點解好多人都係選擇希望難果個可能性出現,或者簡單黎講要求自已就一定難,要求人地就易,呢個可能係人性吧。


我其實好明白呢家年青人面對高樓價,400萬呢條線衝唔破已經好似無將來,未來的樓市可能係無你份。不過,與此同時我又唔認同呢家睇唔到將來就等於無將來,畢竟你仲可以係職場發圍,又或者你儲夠錢等到下一個大跌時機內臨。就算今日聽日買唔到樓住,但其實好多野仲可以做,例如去裝備自已的能力,賺多D錢,呢個先係人生的正確態度。


套用富爸爸一句說話,窮人的思維只會話我買不起,但富人的思維,就會係"我點先買到"?。一個腦閉塞的思維,同一個諗方法的思維,領導出黎的人生係會好唔同。年青人的出路,也許要先從如何正面思考出發,先會有機會突破框框,找到將來。




留言

  1. 供應不足, 貨源歸邊[自住/收租], 導致樓價被夾升, 所以特別是自住樓, 只能終身持有

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力