月入三萬的悲劇

睇完月入三萬的片，好多年青人都會覺得將來好悲，而再睇埋東方個訪問，講述真實版的主人翁身為建築師都要賣車做勞力先買到樓，隊長認為呢個的的確確係一個悲劇，不過悲的地方，唔係因為高樓價，亦唔係因為社會無希望，悲的地方，係因為我地社會教出好多學歷高但無財商的人。也許，在財務規劃黎講，故事的主人可以係用無知黎形容。


無知的代價好沉重，相信建築師本身都已經意識到。不過，比左學費有無學到野，我諗佢自已都可能唔知。


其實由隊長好耐之前寫關於有車無樓的男仔系列開始，已經提出玩車係一件好燒錢的興趣，而呢個興趣的代價除左係錢之外，仲可以係演換成時間。訪問裡面其實亦可以睇到，當然玩車可以有好開心的時光，不過要追番呢Ｄ燒左的錢，到后期建築師都要做苦力去賺錢，你話係咪好慘先？安慰的當然係建築師肯放下身段去追，之但係如果一開始就明人生的財務係點部署，其實又駛乜辛苦自已？


故事入面玩車的錢，我諗車價都起碼無左十萬八萬，而每年佢自已都講話可以儲多5-6萬計，我覺得都係一個好保守的數字，除非佢本身住村屋慳停車場，否則停車場同油錢無理由燒咁少錢。但點都好，我當佢係咁易楂左５年車，實價輸８萬，大約都無左35-40萬。你可能會話呢條都唔係大數啦？不過，其實唔係大數亦唔係細數，當你一個月儲1萬，呢度都已經係3年的儲蓄。而且，呢筆錢的意義，唔係只係在於呢幾十萬，更大的問題係你無左呢幾十萬，佢就要再洗多幾十萬先慘。


其實明眼人一睇，都知35-40萬已經係一個9成按揭的首期，如果你3-4年前有呢舊錢你好易買到樓，不過佢無，所以佢婚后就用１萬元玩租親戚屋企住。當然一方面佢慳左低兩成的租金，不過個cash outflow仍然係有的，當你個親戚唔加租啊，４年都用你48萬啦，燒左35-40萬，結婚就又局輸多48萬，一來一回就80萬了。


同一件事的演譯，除左因為無首期局租外，另一個原因就係悲劇地走去買樓花。老實講28個月的樓花，以天晉３期係2014年10月賣樓計，只係計一計租果下都起碼又無左28萬，如果唔係親戚樓可能仲因為租約年期要前前后后硬食多幾個月，好彩佢有親戚照先輸少好多。諗住慳個裝修，但係就要等28個月，我真係暈得一陣陣，前前后后因為架車，去到呢度已經硬食無左１００萬咁劑。


可能你以為故事已經講完，但其實仲要諗番就係如果佢無玩實，又如果四年前佢係有能力買的話，假設佢果時買個將軍澳中心約莫400萬的610呎建呎單位，今時今日都值550萬起，最少執150萬，咁即係話輸就輸左cashflow 100萬，然后再賺少150萬，total 前后拉埋無左250萬。人生有幾多個250萬? 你或者可能諗話你會搵好多，但如果只計一個后生仔頭十年黎講，250萬係一個天文數字，這是肯定的。


所以，無知唔係罪，但無知絕對係好貴，貴到你未必發現亦未必肯比呢個成本。輸左250萬，意義唔單止係金錢上，仲要係時間上，因為當你要用苦力用更多的時間先追番條數，甚至追唔到，輸的就會係更多更唔值。養車去玩呢D男人的浪漫，唔係唔比，不過真係要有經濟礎先，如果故事的主人翁識行，月入三萬跟住個正確路線行，今日有樓先來養車，根本已經係兩個狀態，叻D的，可能仲已經楂住兩層樓了。


本未倒置的財務規劃，玩死的只係自已，問題的根源，只係財務的無知，但輸就真係輸晒青春的好時光。








http://hk.on.cc/hk/bkn/cnt/finance/20150513/bkn-20150513172139349-0513_00842_001.html