親戚的七層樓之謎


由於隊長的身份係親戚中相對隱密,故此好多時都可以好隠閉咁收風,聽下親戚的八卦野。而最近係聽番一個遠房親戚據說手持七個物業,具体係乜野的一籃子樓盤就不知,但相信今日黎講七層樓亦係一個唔小的數目。


可能你會話七層樓或以上好多人都有啦,又有咩特別呢?問題係如果你個腦計黎計去都計唔到諗唔到呢個人點樣可以買到七層樓的話,呢下先係一個值得研究的地方。


首先,生活係今日的香港,如果你想有樓,甚至好多層樓,最容易諗的就係成功靠父幹。不過,呢位年近六十歲的親戚,父母都係公屋出生,而且近20-30年都已經無做野,基本上係無可能收收埋埋有一大舊,就算有,佢果度五六個兄弟姐妹,點解要幫你一個買七層呢?講唔通的。而計家庭的話,呢位親戚就正正係上有高堂,下有仔女,仲有個老婆咁,一家七八口同住一個居屋單位,所以點計都唔似係有父幹母幹的幫忙。


其實呢七個物業按我估計已經係早響2007年前就買入,當然當時的按揭要求以及仲未有正面信貸資料庫,理論上好似係易D。不過易還易,理論上你都要比首期掛,就當你十零廿萬一間先啦,係唔係咁易係果個年代可以接二連三咁攞到咁多次十幾廿萬或更多出黎買呢?如果你收入強勁就當然無問題啦,不過還記得佢地只係住居屋,其實呢位親戚亦早於十年前左右已經無做野,再推算多早十至十五年,佢都只係做普通搵萬零蚊的工作,其餘主要收入都係靠太太果兩三萬的收入去支持成家人的洗費,老實講又老人家又小朋友番學,再慳我都諗唔到咁多舊首期點样可以攞到出黎?


當然你可能會話,會唔會係層樓升左再加按再買咁呢?呢個未嘗唔係一個可能性,但只不過收入黎講都係靠佢太太一份主要收入,我知當時係可以入唔同銀行狂借而避免計唔到條數,但我更大的問號係佢地都唔似太進取又唔似太識財技的上一輩人仕,係咪真係識得玩之餘仲要有膽量係咁狂借黎買樓收租,呢個又係一大問號?畢竟要記住佢地係養好多人,而且老公的搵錢能力係越黎越低而接近無的情況下,要一個老婆養成家的前題下仲大膽搏殺,我真係唔係好諗得通。又或者,可能係佢地已經搏殺完老公先唔做野,唔知,但以我記憶中應該唔係發左先唔做野,應該係健康問題先局住唔做,好似係。


所以大前題係咁多個首期,相對咁多人口要養,同咁少人搵食的情況下,可以生出咁多層樓,呢個謎真係好難明。而且,難明的唔單止係我一個諗唔明,據說佢地遠房親戚的近親,都唔知佢的發跡係如何練成,彷似好似係突然間由乜都無變成好好景咁。如此這般的一個故事,我真心相信如果我個遠房親戚都有七層的話,咁我諗全香港人一人一層都應該唔係奇怪,不過究竟呢個謎底係乜,睇黎真係無人會知。



留言

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力