政府樓市角色

隊長一直認為，呢個政府成日都唔明白自已係樓市的角色，總係嘗試以行政手段去操控樓市，到頭來越搞越捉蟲，樓市就因為嘗試而更被扭曲，再加上無數的出口術，其實認真講真係累死好多人，有時真係唔好亂柒做當幫忙啦。


具体黎講，其中一個政府最硬膠的動作就係嘗試去操控樓價，但樓價卻偏偏係多方面因素而合成的一個結果，故此我當有十個因素導致樓價升跌，政府可控制的係5個咁講，本身呢5個因素你政府搞唔搞得好都已經係問題，但就算比你搞好晒，可能另外5個先係更大的影響，成條formula你可能根本能做到的可能不到20%，但你又比市場訊息你可以搞掂個市，可憐係果D唔識閱讀市況的市民，就真係比你係度搞一搞打一打，搞亂晒步伐，本來可能可以上車的就等，上左車諗住老老實實生活的，就又比你引左賣出黎，幫你反而可能變成害你。


其實站係今日香港的情況，有幾個好大前題係香港政府無得搞的:


1. 北水南調 - 香港資金係自由流出流入，加埋單程證，投資移民，就算有BSD，其實已經有好多新香港人都有身份證買樓，而且唔太關注價錢係因為一來係身份象徵，二來可以洗干淨同帶走D私己錢，呢個方向未來幾十年都唔會變！

2. 利率走勢 - 夾著聯匯，香港的利息係由美國聯儲局定立的。睇番而家美元被升值，老實講點加息啊你咪玩鳩我啦？當然打個底先我唔係話唔可能加個0.25 - 0.5%去象徵式咁支持下個國威，但隊長所指的係一個長加息的周期，或一個正常息率的時間，而呢個低息時代係目前黎講係無可能變，除非美國玩自殺，咁唔加息你香港政府就由2010年吹加息吹左5年，隨時要吹多5年先加，中間信你果d人真係比你玩死啦。

3. 土地供應 - 講真呢個問題似係政府能搞掂，但實際係無可能的，因為香港真係比政府用得玩得的地，其實唔係已經show左hand，都已經掘得 7788。仲想攞出黎果D地，就比區議會地區勢力玩死，就算比你攞到都其實起支單幢無乜用。舊區重建其實本來係可以釋放好多地，上個政府做岩一样野係強拍由9成變8成，但今個政府玩DSD或公司BSD等等，即時死晒，呢個政策又會拖慢香港好多年。效野公園條例動不得，農地唔比你補地價，鄉議會其實劉皇叔又一堆地但就因為地多就惡到暈，加上689條仆街上任后搞到滿城風雨，地產商無個有啖好食，新地仲要坐埋，地產佬唔同你玩野都唔會同你配合，擺到明大家等你5年任期完就射你落馬，呢兩年根本只會拖拖拉拉，根本其實無得搞。

4. 剛需強烈 - 其實呢兩三年由於不停調低按揭成數以及出柒招谷爆細價樓，最大問題就係好多錢谷住由識郁的cash變成放係銀行唔知做咩的cash。以前會有換樓有中價樓去燒左呢D錢，但換樓鏈停左之后D 錢局住買細單位或唔郁，舊錢坐左係度都算，但本來要來供大樓的cashflow又變成左呢個cash pool的新力軍，時間一長呢舊錢就會發酵，借錢買樓的人係少，但係市民手頭舊錢就多左，仲多左好L多，你唔比佢買，有樓的就更唔想賣，大家鬥儲cash，去到臨界點d錢就會湧出黎，呢家你可能話癲，但我認為呢家都係未癲完，或者只係半場而己。


太多太多的因素，政府根本就唔係個岩的position去發聲，但就係咁出口術同做錯決定，搞到個市場立立亂。無辦法，689上場最重中之重就係搞樓價，如果呢样野都唔講，佢真係無乜好講。可惜，隊長其實要重申一點，政府的角色只係認該提供一個健康同公平的市場，然后再提供基層的支援，對於中間的私樓的價錢，再殘酷都好，但價錢的確唔應該係政府要承諾的一部份。


老實講，全世界印錢，overnight每人身家都可以多個零，政府又點可能係隔夜間起10倍的樓出黎? 樓價上升，唔係香港獨有，全世界樓價都升，做到野做唔到野，都係一個大勢，嘗試去對抗大勢，只係螳臂擋車，成炮灰的時間，仲害左一班信以為政府幫到的市民，咁又有乜意義呢？