專注

經常有人會分享佢地的投資或搵錢大計，相信每個人身邊一定有唔同的賺錢方法，亦更加會有人去說服你加入佢地的行列，一齊賺大錢，對於呢一個命題，隊長我一向都係比較小心。


當然，咁多呢D鴻圖大計入面，我地可以大致分開為兩種主要的項目，第一種叫賺錢的，第二種叫蝕錢的，而換個角度你亦可以理解為成功同失敗的賺錢項目。所以如果有人同隊長講佢的賺錢方法時，第一個隊長會思考的係你堅係咪會賺到錢先，定係可能蝕錢的機會仲大。舉個靚例，大家都知我唔係太支持全職股神呢回事，所以當有股神同我講佢買乜乜乜又賺左幾多錢的時間，可能係大圍的情況下會有D傻仔照單全收，但問題係佢又有無講比你知佢輸果part先? 就好似某財演咁，講就好似真的一样，打開成績表就輸到阿媽都唔認得，不過一样呃到好多C9，呢D咪就係要有獨立思考先掂。


而另一方面當然就會有人話，係啊，我果個大計一定賺錢Ga!!!不過思考一下，其實當中亦有好多奧妙的野令我有無興趣去加入的。


先退后一部諗，大家可以望下條街，基本上好多你眼見到的野都係一盤生意，無論係巴士的士茶歺廳同看更，都係理論上賺錢的野，但有兩個問題就係，你想唔想做一個看更去搵果舊錢，又或者你有無咁L多時間做晒巴士司機的士司機再經營茶歺廳以及又做埋看更之后又炒股又炒樓咁L把炮先? 呢個世界有賺錢的野先會有商業行為，有商業行為先有現代的社會，所以样样野理論上都可以搵到錢，咁老實講一個人得24小時，你邊有得做晒所有野Ga?就算你盡做，賺埋都唔夠你買補品補番個身体又值唔值得先？


所以隊長傾向首先就係果样野有幾攞我的時間同回報，以及我有無興趣去做為主。又舉個例，你開間茶歺廳日日早六晚十一咁，一間D伙記又射波唔番工你又要落黎頂，成盤生意一腳踼年中無休先搵得十萬八萬，但如果你份工又唔係太差都搵五六七萬，咁老實講你係咪有好大動力要搏盡條命去做個茶歺呢？我個人黎講就認為機會成本太低，唔化算了。之但係如果你係個看更搵最低工資多少少，咁呢家有個十萬八萬機會，咁又未必係同一講法。所以一個項目吸唔吸引又好睇你本身做緊D乜，可否兼顧。有時你諗下簡簡單單打份工，你夠薑part time個的士黎做，可能一個月都執多幾千，咁就可以魚與熊掌都食埋。


不過上面個part time的士例子其實又衍生一個問題，就係你會發現原來一個人可以同時做的項目係唔會太多，假設你投資的野係時間，咁你就最多得24個鐘，無得再多，所以你無可能一日楂十更的士，除非你識分身；而如果你投資的野係錢的話，咁就好限於你手頭上有幾多錢，可能你得100萬，你用左黎買樓，就可能唔可以用黎搞生意，不過有時時間一長你就會發現，可能用100萬買樓3年執100萬，但用100萬做生意，可能蝕晒，可能都執100萬，又或者可能做到上市，無人知，不過大部份我眼見的都係蝕的為主。所以其中一個問題就係你如果得一注，你會買落邊個項目度？有時唔係話你個項目唔賺，只係我只會揀最maximize我個return的項目去投資而已。


但係身邊有D人好貪心，百足咁多抓咁係咁搞呢样搞果样，呢度又話夾D果度又話夾D，當然好彩的精力旺盛者，就等於漁翁撒網，希望中一個爆發的機會就正。之但係我認知的，好多時又因為太過散，样样野都係半桶水（都無），所以項目死的機會就因為分太散而增大，所以我個人黎講，真係好怕D人開幾廿個火頭。


我成日都舉例就係少林七十二絕技，咁多年都係得達摩祖師識晒，其他高憎好多時都係專攻一招或幾招，亦已經可以獨步舞林。所以如果你明白呢個道理的話，亦即係話錢係搵唔L晒的，有時你搵到適合自已的工作同投資項目，基本上已經有兩招了，然后專心D去令自已係呢兩招度成功，已經可以相當唔錯了。再叻D的，識多一兩招也就夠用一世了，賺得再多，李嘉誠都駛唔晒自已的錢，但如果要用身体健康，用無數個OT時間假期玩樂時間去換取我用唔晒的錢，隊長個人黎講就唔太感興趣了。


所以有投資項目隊長我都有興趣聽，不過大部份時間我都未必會參與，唔係話無錢賺，只係隊長我看來都已經有兩招用了。第三招，除非威力好大，否則都唔太有衝動去練。