一粒子彈

有朋友係日前討論，話認為自已的人生沒什麼突破，打份工做下去死路一條，所以聽講另一個朋友在中環某唐二樓出租下，突然諗緊可否搞一間蠔吧，嘗試殺出一條血路，亦想聽聽隊長的意見。


朋友年紀大約係36左右，打份工我估計大約25K收入左右，無物業，儲蓄我估計大約係80萬左右，所以佢想大約限自已用50萬左右租下那大約2萬月租的單位搞呢個小生意，從生活中找尋突破。一聽到呢度，或者隊長已經滑左小小牙，但對於有數次搞小生意的隊長黎講，實在汗顏地比下一個意見，就係唔好搞。


大家身邊可能出現好多令人回味萬千的創業成功案例，又或者閣下已經有一條成功的方程式，而隊長係一個生意的失敗人，所以係有限的認識下，我認為大部份未創過業的人都係比果一個＂無限可能＂吸引住，亦比成功的案例打下左不名來歷的強心針。之但係實際黎講，我相信創業能夠頭一年的人，失敗率係超過九成，而失敗的人未必會得閒同你講太多失敗的感想，所以往往能夠流傳開去的故事就只有剩下來的10% ，咁你認為你係成功定失敗的果一批，就要自已諗清楚。


事實上就算你過到第一年，突然剩下的人又可能有10-30%係會超級成功的，之不過剩低果D又有可能係有一部份半生不死，有一部份只係撐住等死，有一部份係小小成功不過到第2年后又業主見你成功又加你租，到時又係得啖笑。所以計數上，原諒我無大志，不過如果你計黎計去都係等於你打份工的收入，咁如果只計錢的話倒不如真係打份工算了，畢竟打工就有收工時間，但自已做生意又上身又上心，腦細胞都死唔少，真正能夠大成功的，可能不到3%-5%的人。


朋友聽完隊長咁灰的comment，就一句話隊長我唔明白佢，因為隊長已經拥有了許多。老實說，我同佢講我話我正正就係明白佢，先勸佢唔好亂黎。其實以一個沒做過生意沒經驗的人來講，我諗佢可能未計得清條數，特別係佢話50萬當輸左就算。我同佢講其實呢個就顯出佢未遇到心寒的情況，始終投資的野，大家諗果時一定諗賺到錢先做，無人會諗住蝕都衝入去咁傻L仔的。不過現實好多時都係相反，一開波你D錢好似開水喉咁狂啡，試諗下你50萬搞完裝修比完deposit入完貨，你可能都差唔多乾晒，之後比你捱你三個月你見到都係月月蝕，錢又用盡咁你點？屌，咪又係再泵錢入去，邊到你話輸50就50，一定會慢慢閹乾你，你又係咪準備好先？


其實一個生手搞生意，情形就好似呢家比一支槍一粒子彈你去射你的目標，你打中就win，打唔中隨時比人屌番轉頭，輸就輸晒。但你呢家有小小情縮高漲對現實不滿，攞起支槍你諗都唔諗，大約見到個目標就鳩射，打唔中其實亦係人之常情。要轟轟烈烈咁輸定係冷靜等待機會黎臨一擊即中，係你自已揀的，無人可以幫你。


當然係呢個時候，有點不耐煩的佢就話等機會黎，等到幾時？我再做落去都無意思，比我做多十年儲到200萬好味，一样係買唔到樓，一样係乜都無，人仲要老左，輸埋通漲，咁點算？是的，我話我真係無可能話比你聽等到幾時，但我更知道如果你個成功率唔夠高時走去做，輸左的話你一鋪清袋，到最后咪又係去番原狀無得揀之餘，仲要可能當下一個機會真係黎時，你咪又係把握唔到？


朋友佢又反問我，咁呢家有錢的話，應該點做，係咪應該買樓，比隊長我點投資。我同佢講我話呢家我係佢，就乜都唔做，唔好手痕，唔好投資，就算連樓都唔好買，主要原因係佢唔需要考慮自住，純以投資出發今日的樓市一方面黎講唔抵搏，而且我係佢咁有心要搵野搏的話，就更加應該坐住舊錢等一個比起蠔吧比起買樓有更高值搏率的機會先做野，始終睇佢個勢都係會辭職唔做，然后全力搞生意，所以唔手多盡力集中儲錢等，先係目前可做的。


一個無答案的討論，隊長其實都唔知幫左佢定害左佢。又或者佢講得岩，隊長可能拥有多左，所以就唔想太搏。又或者學另一位網友咁講，其實本身我地呢D都係懶底，你叫我突然好似著晒火咁衝出去搏，同我呢家眼見的野可以hea住做都得，我真係唔係再好有心去搏，畢竟錢係賺唔晒，機會捉緊左，而家要做的只係唔好比佢流走就好了，有時成功真係好睇你果粒子彈有無打中目標，人人目標唔同，機會黎的時間都唔同，但機會黎的時候，你有無準備好，可能先係人生的關鍵。


鳩射，我真係玩唔起。