新香港

兩年前寫過一篇溝淡的文章係以溝淡為樓市同經濟角度出發，今日梁大特首又話年輕人唔應該把目光只放係香港的時間，又同時話香港無人材，要以較寬鬆的手法引入人材，人的去留亦自然會成為對樓市需求的原素。


其實從梁大特首的字裡行間都睇到一D落筆，因為一邊話年輕人應該放眼大陸，台灣，星加坡等等之餘，即係叫你可能離開香港發展的同時，又話要引入人才黎香港，好明顯即係話新一代的年輕人似乎唔係人才，而在香港的機會則是留比所謂的外來人才。呢個論述，配合佔中行動，幾可肯定係一個全面的國策，即中央都唔係太信任新一代的香港人，所以香港的政策並沒有考慮如何令新一代的香港人變成人才以爭取香港的機會，換句話說即係年輕人，算吧啦，機會是沒有留給你們的。


從整個中國的大畫面黎講，由兩年前的情況到今日的政治氣候已經唔同左好多。兩年前的香港最多只是寵壞了的孩子，但今日的香港是壞孩子，在中國樹立了一個不好的榜樣。所以如果我係習總，無論兩傘行動最後怎樣，大方向一定就係要主動及積極的掌握同滲透香港所有的階層。理論上的確一個兩制已經無乜意義，香港咩核心價值唔價值，在中國的版圖上其實根本也不值一提。試想想，中國沒有了香港得唔得？我可以肯定的答你，中國無左香港仍然係如日方中，中國無左香港一样係世界大國，香港對中國來說只係錦上添花，有就好，沒有也沒什麼大礙，最緊要就係香港唔好成為一個搞搞震搞亂檔的地方。


除了在政制上面唔會讓步比你真普選之外（比你選到個唔聽話的咪仲亂到仆街？），一個假普算同埋社會的民情聲音理論上都係北京政府要控制的。而要控制民情的方法，一方面當然係靠媒體，另一方面就係令香港有更多的中國人落根係度，而呢D中國人最好就係本身土生土長於國內，沒有太多思考，只有國家好香港好的一個思想的意識形態的人，咁到時話之你一人一票又好咩都好，大權已掌握在手，民情亦歸心，老香港果份本土意識亦自然被淡化同沖洗，到時唔駛2046年，香港人都變晒新香港人，咁又何需理會50年變不變？


因此，如果你係窮得眼裡只有錢的話，咁一個好消息係未來呢幾十年配合寬鬆的人口政策，落黎的人排公屋的就排公屋，買豪宅的人就買豪宅，香港樓的需求將會係源源不絕，樓價將會有一個非常強勁的支持。可能你會話咁都有班年輕人會走左去第二度發展喎，一來一回都應該減番D需求吧？不過，你可以諗香港人都係有條根係香港，就如好多移左民的人一样，都會Keep番間屋係香港等回港探親旅遊時用，所以人可能唔係香港，但物業同資產其實都會仲係度的。


回歸現實，中國好其實香港都真係好，呢一點是母用置疑的。作為中國的一個城市，香港也有一定的國民責任，不過要劃清一條責任同本土意識的線時，是在中間下墨，或是中間偏左，就要看往后的政治變化。要搵錢，特別係要係樓市搵錢，配合國策的話，似乎只要肯買都唔會有問題，只是到時把目光集中係數錢的你，抬頭一望可能會發現，景物依舊，人面全非，你置身的已經是一個新香港了。