初次上車的惡夢

[呢篇文寫左好耐,唔記得Post]


不得不承認,第一次買樓人,無論財政,視野,技術,心態上,都係好幼嫰,一個錯的決定,加上心態軟,再問十九幾人的意見,到最后就越搞越亂,特別係落完訂後,又擔心自己買貴,又擔心做mortgage唔批,日子一日一日咁過,銀行久唔久又叫你補文件,又話你呢样唔得果样唔得,諗諗下自己的首期幾十萬好似要撻咁,夜晚又訓唔好,訓唔好又諗唔到,諗唔到又再訓唔好,自己一步一步迫死自己。


突然講番呢件事,係因為一個朋友最近以9成按揭買細價樓的故事,亦令我諗番起我買第一層樓時每晚的心理戰,畢竟最難捱的的確係初次買樓時要你係限定時間內做好mortgage,做唔好就撻定的大前題下,感覺有D似玩命。


不過朋友的故事,我卻認為有多個錯誤之處可作參考。佢係一個人買樓,諗住做9成,人工則為底薪加佣金,手頭上儲蓄大約300-350K左右,必要時家人可比多100K出黎。因此,佢就選擇買一層約250-260萬的樓,再掟幾皮野執一執靚佢咁。


當然佢唔太知隊長的身份,但都知隊長有買樓的經驗,所以之前我有提及過佢買樓做9成最要計清楚,因為commission做9成唔一定計,而佢亦搵左銀行做所謂的"預先批核"。老實講,隊長就唔係好知呢家有邊間Bank肯做"預先批核",以我的理解佢果個所謂的"預先批核",到最后發現原來只係比個RM睇過下佢條數,而個RM亦"好負責任地"同佢講唔得就最多搵個人黎擔保就OK,所以佢亦放下心頭大石往前衝,畢竟攞住30-40萬買250萬左右的樓,應該無乜問題。


買樓的時候,其實有兩層比佢揀,一間靚裝細單位就240萬,另一間普裝大小小就260萬左右,隊長的意見係呢家買樓有咁平得咁平,細小小無所謂,做mortgage亦易DD,裝修亦執平D,而且我認為240果間係低水左,但奈何佢就堅持260萬果間,因為間隔稍為好小小,所以有時真係吹L漲的,其實大小差DD,差成20萬上車,不過佢堅持我就無計。


成交了后事情係一兩星期后就開始急轉直下,銀行方面話佢單名做唔足9成按揭,要搵人擔保。但擔保佢的家人又因為唔係本地收入,呢家又要等銀行再批,但由於呢兩件事的出現,搞到呢家晚晚訓唔著。隊長就建議佢,不如計清楚呢家手頭有幾錢,搵多間銀行做個7成按揭先,相信7成按可以易批D,又快批D, 打左個底先起碼都係諗多2成左右的事,即諗多52萬左右,減佢手頭上多黎的現金,叫做諗多35萬左右就得,總好過你到最尾如果乜都唔批仲大穫。老實講,35萬,必要時叫屋企人去借條P-Loan都借到番黎,何需呢家擔驚受怕呢?


但問題又去到計數上,佢認為如果要還P-Loan係5年還35萬,每月還多6500蚊係好大的壓力,佢唔願意去捱呢5年,而因此佢對我的方案以及說過的東西起了變化,認為我唔太明白佢需要什麼。Well...其實隊長我都好簡單,我認為佢的底線係怕借唔到錢要撻底,咁我的建議只係先令佢唔駛跌落呢個底線位,換句話說,撻定同捱5年,你揀邊样先?可惜,心態亂左的佢只覺得我push佢守5年,開始抗拒我的建議。


再隔幾天的update又令我奇怪,佢去左一間新的銀行,今天採納我一半的意見,計清楚自己條數,所以佢認為佢的能力大約可以借到78%左右的二按,而之后果D錢就諗住搵屋企人搞掂。有經驗的你我一睇就知,你借超過70%又係要經HKMC,經得HKMC又係唔知要搞幾耐,又唔知批唔批,呢個決定我唔可以話唔合理,但理論上最少無係短期內解決件事,而佢繼續投訴自己壓力好大,訓唔好,咁我話你不如用我方法再搵多間做7成打左底先好嗎?


而呢一次佢可能已經壓力爆煲,開始問番我點解一定要跟我果套,點解一定要搞到自己咁辛苦(即要捱5年)。我答佢有時呢D野唔係先甜後苦就先苦后甜,你后生唔捱幾時捱?再者,呢家你能力不足,能夠捱5年有紀律去供下樓,其實都係好事,好過你做左9成但中間fing晒D錢。當然,一個合理的問題即刻番番黎問我,點解唔可以小小甜又小小苦呢?我答佢呢個問題係好合邏輯,不過現實話比你聽,你唔得之嘛。呢家唔係我唔夠錢,唔係我唔夠人工去做mortgage,係你唔得之嘛。錢就一係一早儲出黎,一係就你借多D然后還ga la,遲又係還早又係還,你買得樓就預左要還,你唔借就撻,咁唔關我事喎,我只係方法比你解決,但你就選擇唔去解決折磨自己,咁我都無計ga,咁我唯有咪希望你做到9成按,但呢段時間你就得自己食晒壓力大的問題了。


成件事我覺得有兩個大問題,一就係佢無自己認清自己的能力。講真,如果佢聽我講買240萬果間,呢家起碼諗少十幾廿萬,計數上都會幫到手,但佢揀樓又加插左佢自己一D其他的價值觀係我唔會認同的。另一样野係,我相信佢一定問左好多個唔同人的意見,問到自己越來越亂,搞呢D就真係無得講。


其實我出心都想幫佢,但我好怕呢D跟一半又唔跟一半的行為,正所謂唔咸唔淡就係呢隻。作為朋友我都希望佢盡快批到,但呢段時間佢就唯有自己受下苦頭了。

留言

  1. Forget about it, some newbie up car people pick 2/3 million things are like picking a palace

    回覆刪除
  2. 第一次比個讚您既隊長... 好似你話齋, 佢買樓, 你作為朋友, 已經將生平既經驗過左比佢, 佢唔接受你果套, 您都唔好咁勞氣啦~

    回覆刪除
  3. 都係個句,有能力先好做,上會都唔好計到咁!

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力