俄國債務危機

首先今次油組唔減產，隊低個油價令盧布單日急瀉38%，你話睇唔到美國佬手影就勢係假，而最令人聯想的當然係之前俄羅斯走去搞烏克蘭，呢家美國佬一出招就搞到你周身唔得閒，可謂一擊即中。


隊長必需承認唔係俄羅斯專家，但只係從大環境去諗一諗呢單野，而第一样野大家擔心的係俄羅斯國債，因為匯率跌咁多，俄幣無人要，外匯又未唔夠的情況下，違約風險大增，所以呢家債市即時有反應，好多債價都跌左，VIX又升，如果癲起上黎俄羅斯違約，你唔會知道究竟你的交易對手坐左幾多俄債或油公司債，大家可能就唔會再敢買債，有錢都keep係手，情況就等於之前的金融海嘯咁一個食一個，可大可少。


當然，就係因為我地唔熟俄羅斯，香港應該就唔係風眼附近，反而要驚的應該會係歐洲，因為俄羅斯係地理形勢不嬲都同東歐西歐有千斯萬褸的關係，故此如果歐洲無啦啦食一大堆呆壞帳，係疲弱的經濟下，無可避免將會再受重創而要加大力度印錢救經濟，咁當然實物如磚頭就繼續受惠。


但俄羅斯係咪坐係度等死又係另一個問題，一方面佢地已經開始出售國外資產特別係股票去救市，不過老實講賣資產都係救得一時唔救得一世，一日油價唔上番黎，匯率唔穏定，俄羅斯都係等死，所以有可能反而係要外交途徑去同美國佬暗地認低威，又或者要阿爺幫手打友情牌去買債支撐下佢地個匯率同債價先會有計傾。


而老實講我地企係呢個位有小小都可以話係隔岸觀火，一方面油價平其實係幾利好經濟，尤其中國係石油誰口國，有平油簡直係爽，再加埋油價平令成本下降，經濟活動將有機會增速，係中國經濟下滑的情況下會有相對正面的幫助。而油價下跌亦會令通脹降溫，加息的壓力又更加遠，所以對投資者係一件好事，特別係我地呢D物業投資者。


不過隔岸觀火還觀火，如果一旦還球股市崩盤，咁又會唔會燒到黎我地呢邊，係有可能的，而股市小跌雖然未必形響樓市，但股市大跌就大家一定會擔心D，特別係如果銀行一收水，咁就係淡友的天下。今時今日好彩的係借貸比例唔高，如果真係要守的話我相信香港業主守一年半載唔會係問題，只係經濟到時如果急速向下的話連份工都無埋就難以估計。


如果你認為呢件事係美國佬人為去搞野的話，即如果呢件事係一個世界舞台上的政治事件的話，咁我相信係未傷及實體經濟前都會有一段時間可以頂一頂的，即美國佬可能會最少玩你俄羅斯一兩個月，起碼陰趕你傷你幾年的元氣，然后先抬番個油價上去，到時可能有一個完美落幕，俄羅斯經濟重創，其他經濟体系就當小病一場，咁就唔會影響到Ｄ乜，而呢個亦似乎係最likely的結局。只怕到時美國收唔切制，真係推冧全球個市就大穫。


但點都好，我相信呢家有一招萬試萬寧的金丹就係QE，如果有咩事上黎，最多都係不負責任咁再印多D錢出黎，只要一日有人相信自己的貨幣如美金歐元同日元就好了。故此呢場Show點結局都唔緊要，但我睇到好大機會中短線可以好波動，但長線黎講，物業投資者好大機會都係嬴家。