2015樓市展望

2014年仲有兩日就接近尾聲，當然又係時候總結一下今年以及估下出年個樓市。


2014年黎講都算係一個比較意外的一年，雖然隊長一路都叫人入細價樓，亦一早預期當物業的內在價值升高於辣招的價值時，樓市就會崩堤咁爆發。可是從時間上我並無預期2014年從五六月開始爆升成年，而且我亦本身以為樓市只會升一格就橫行，但而家睇黎個市已經升左大約兩格甚至三格，而且某Ｄ區份同屋苑更以越戰越勇的勢頭，所以隊長一年多前豪言上車盤要升至500 (后來下調番肯定過400)的呢一個中長線目標，看來係又邁進一大步。


雖然隊長我已經停左買樓一段時間，但星期日時都九痕痕走去八下樓市。令隊長我驚嚇的係，睇田土廳成交實在係太過唔貼市，即係話你睇少兩三個禮拜的成交，個價已經唔夠update。以得寶同淘大黎計，淘大兩房面價嗌470萬，一房殘裝380萬，得寶大一好似近市價的都已經賣斷無盤，得間細一叫340萬，而簡單Ｄ講呢三個單位已經係叫做較為貼市的放盤，供應緊張的程度可想而知。


由於我地踏入20121026呢個二轉三的時間，流轉中的樓又再被鎖死，供應緊張程度真係極度誇張，說老的如果我無樓的話，我都真係唔會買呢堆野，始終要比market再高的價去承接，投資的角度出發實在無法接受，但如果你係局上車的話，咁無計，排到黎就係要食呢呢個價。


因此之前亦有人問我點睇2015后市，個人認為2015都會係呈上升的格局，畢究跌落黎係需要有人大手掟貨，不過以咁低息，咁多資金，咁低槓杆又咁少人想賣樓的情況下，我真係諗唔到大跌的表面理由，除非爆隻黑天鵝如俄羅斯單野又掀起巨浪，不然係90%的情況下都看來係要升多一輪，特別係小陽春之后至五六月就可能因為升到太急而要開始橫行一段比較長時間。


講到呢度，有讀者好快咁問我咁係咪即係之后會大跌?確實我對呢個問題是顯得有點不耐煩，因為我好難理解點解唔想就等於跌？反過來我舉了個例，你如果升職升到某一個位人工就不會再大升了，咁以后你人工係咪就係減薪又或比人炒尤呢？答案顯而易見，我對呢個問題本身的思維實在有好大的抗拒，燥左真係無辦法。


不過都係咁講，隊長唔係神，我亦唔係做緊任何分析，更加無乜數據支持，之不過得出以上的結論你可以話係鳩估，又或者可以話係一種對市場的觸覺所產生的一個腦海的影象。因此如果你準備買樓的話，你可以攞黎做參考，但升升跌跌就唔好冤我，畢竟係300萬之后我已經少作出肯定的陳述，因為那一格很明顯的升幅已經升了，聽我講的人應該也賺了，但到呢一刻好難再睇明顯升幅，而且搵盤亦有難度，呢段時間買樓，就堅要自已諗清計清，舒服先好做了。


點都好，有樓的你，祝你2015年賺多D，大家一齊向財務自由再邁進啦！