佔中下的樓市

佔中事件由最癲果幾日，回到目下稍為平靜，有好多人當然會開始問對經濟，特別係樓市會唔會有影響？


從二手睇，好明顯呢一星期的黃金周本來應該會旺番，但受佔中影響我相信好多買家都係觀望態度，所以成交突然靜番落黎，而當中亦有少量成交係稍稍要業主落番價的，不過睇黎都仲係響之前的高位有承接。


一手方面就仍然大旺，星灣御共推220伙，發展商首輪的194伙，成功賣出191伙。柏傲山推132伙就賣出至少129伙，從呢兩個盤黎睇一手的中價以及大價樓都有非常強勁的承接，而呢一下其實都幾出手隊長意料之外，因我之前個人估計一二手都應該係觀望，但呢個咁強勢的承接足以證明呢家個市有幾咁旺。


佔中的影響，當然有部份的商戶以及自由行所關係的行業或交通等等，不過隊長認為所覆蓋的層面其實都唔係太深入，即當然有人會受到經濟創傷，不過香港底子厚，所以要影響承接力的話我相信係沒有，反而係信心問題先會係對樓市一個長遠的影響。


當然有無普選呢一刻都唔知，不過今次雨革行動除左激發左催淚彈傷左香港人的心以外，其實全球記者都幫香港做左一個超級巨型的marketing campaign。香港的學生亦顯示出極高的公民質素，係全球面前攞盡掌聲，而呢D掌聲相信比起香港貿發局去點样宣傳要黎得更有效，一個雨革的成果可能仲超過過去十年貿發局的努力，特別係有目共睹的全世界都會對中國的極權有介心，所以中長線黎講我相信西方踏入中國的門檻將會繼續以香港為首站甚至基地，亦即係話會繼續吸引西方人仕來港，故此無論從人口方面以及經濟活動方面，都應該會有更好的發展。


不過佔中一日未完一日都仲有小小隠憂，因為大家都未知會點清場收科。但係學股市的術語，當壞消息盡出之時，香港的樓市會點呢，相信都會繼續升。點都好，繼續關心事態發展，希望大家可以和平理性咁爭取到民主自由就好了。