佔中形勢分析


隊長我呢家支持梁振英下台袋住先,主要的目的,係因為我地要以快打慢,攞得幾多得幾多,特別係呢家無主辦單位的情況下,大家無策略去做,戰線一拉長,好大機會市民自己泄氣回家,敗軍之勢一成就好難再做下去。


就以目前黎講,中環金鐘當然係主場,其后亦開左旺角銅鑼灣兩個據點,亦有人在上水開始集結,仲有人討論搞埋金紫荊廣場同廣東道。講真,開一個據點其實不難,問題係你如何守得住個勢先係關鍵,人數上你要做多一個據點就要多一兩萬人,係呢家氣勢如虹下無問題,但係過多三幾日,叫你日日訓街,訓足一星期乜都無的話,軍心就會不穏。呢幾日到星期日我諗都唔會有問題,因為大家放假,之但係到下星期一二,如果仲係乜都攞唔到,又搞左一星期,一定會有人泄氣,泄氣就人數下降,到時為保中環人數,其他據點一定慢慢失守,敗軍之勢一成,民心或會轉向,受影響的市民的怨氣會升,想回復正常的市民亦會變得激進,部份爭取心無咁重的人亦會放棄, 阿爺同CY政府就唔會怕,而且輸左呢次就無得翻身,所以我地必需認清目標,盡快攞到D野支持住個活動的氣勢。


要攞到野,係強國國慶的前題下,習近平你叫佢做政改讓步呢種咁失天威的事情,我相信難度係99999級,我唔可以話無可能,不過呢個涉及中央的天威,加上習總強硬的作風,以及黨內的鬥爭,堅難。不過如果只係為呢次事件搵個替世鬼的話,起碼出師都有名,如果祭旗可解決事件,隨時仲可以攞分,呢個選項,應該相信比起中央讓步呢四個字容易。當然好理想的我地可以去爭取所有野,但問題係市民根本無代表可以去做談判,而且所要求的野可能要傾成一頭半個月都唔會完,講真有幾多人可以支持係條街一頭半個月,無的話傾傾下都無籌碼了,怕咩?


好啦,如果大家認為我地香港人可以佔領更多野黎迫宮,咁老實講都係果句啦,要CY下台相對容易,但要中央讓步都仲係難,市民如果咁搞,如果中央態度仍然強硬唔理,咁點先?拉到極點,一個可能廢左的香港,去傾政改,籌碼就係佑佢繼續廢?短線都有得傾ge,但長線就即係中央都無所謂啦,廢左的香港要唔要都擺啦,你估中央會唔會怕無左個汕頭級的市?所以我地唔可以係長時間用廢香港去傾,即係要短時間搞一搞攞到野就收工。


不過我個人認為今次政府學乖了,其實市民咁和平,咪開幾條線比市民係條街坐幾日囉,比你佔中十日八日,唔派人黎鎮壓,日日只係勸你番屋企,慢慢悶死你,到時好大機會又係敗軍之勢,到時得不償失,功虧一簣,仲要set左個sample case 係原來上街都無用,咁我相信市民就無晒招了,政府同中央就更坐大了,以后都不怕你們了,反正上一上街咪又係番屋企訓教,怕什麼?


所以理想還理想,現實都係要趁呢家氣勢如虹時集中火力迫CY收皮先,然后大家有個下台階可以番屋企,然后再慢慢爭取普選,如果傾唔掂就又黎過上街,且戰且走,先為上策。沒有策略,沒有目標,比你佔條街一千日,又有何用?






留言

此網誌的熱門文章

被退休的CEO

DSE題三: 專精一事還是多元人生

大圍車位的潛力