走位

當人係職場上越打滖得越耐，就會發現呢家世界其實並唔完美。無日無之的矛盾，唔合理的事情天天都會係你工作環境發生，好多時根本就無對與錯，所以如果你唔係間公司的老細的話，老實講唯一生存的技能就係識走位。


老實講隊長岩岩出黎工作的時候，同大部份畢業生一样都係諗住大幹一番事業，那時的我充滿熱誠同埋能量，對工作有堅持，實實在在可以話係一個務實的大好青年，所以亦係公司成長的時間能夠與時並進，共渡左好一段青蔥歲月。


不過呢個世界無野係永恆的，商業社會所出現的併購同政治鬥爭，係我公司同我客戶公司，係呢段時間都出現過好L多次。講真有幾多人認為自己係事業的高峰之際，一個併購殺過來你就三幾個月乜野都可以無晒，客又好自己友又好，越坐得高就死得越快，真係有所謂高處不勝寒。


能夠生存左咁多個變遷，老實講隊長都可以話係誤打誤撞入到個好位，所以回顧番都覺得自己幸運。但歸納番生存之道黎講，最重要的就係做左中層之后要好識走位，左閃右避，盡量低調作風，但又久唔久自己蒲頭等人知你存在，但劃個orgchart果時，最高果堆人入面又無你，最低果D chart入面你又排得高高在上，之后你就可以達致一個景界就係，大事就唔到你理，小事就唔駛你理，你個位基本上似是重要卻又不怎麼重要，咁炒人果時可能又唔會揀到你，叫人做野果時又唔會諗起你，每個月底就又準時出糧，呢個就視為打工最爽的狀態。


不過你可以話係時勢造英雄，等同於今天香港的政局一样，隊長慢慢都開始喜歡見到亂到仆街的政治鬥爭同場面，因為亂呢個字，係需要時間去撥亂反正，之但係政治層面上咩叫正又係因人而異，所以一個企業併購后搞你一年半載的亂局，搞完后都唔代表係搞好的情況，對於我地呢D打工仔就最過癮，因為反正你地忙完一輪后，我都唔係好知你地想搞乜，反正樹大好遮蔭，你地搞乜慢慢搞，最緊要係你搞幾耐都好，我都係準時出糧咁得意就very good了。


有時唔單止係內部亂對你有著數，初時我以為D客比人食左都唔係一件好事，點知又好難講，拖下拖下個客D人乜Q都唔做，佢地自已都知命不久矣，亦懶得煩你，係一個混沌的狀態下，你又有番一D舊單繼續跑呃到下人之時，D客講乜你又唔係好駛聽，因為可能過幾個月佢地都係比人炒，大家都係敷衍了事，對內你又解釋番呢個情況，上面又唔會咁短視因為個客一年半載咁的情況就搞你，所以久唔久報下情況其實又當交左功課，老實講大企業就真係存在好多呢D灰色位。


識走位的時間，最緊要係自己知自己要做幾多野，你想咩都唔做又有錢落袋咩，講唔通。但你如果要做到死咁搏表現咩，又係你自己硬膠。總之做適量的野，交到下差，咁就已經能生存。有時你見自己個客柒柒地咩，一年搶番一兩個客仔係無人肯跟的，做唔做到唔係好重要，求求其其開會時有野講下，西下遊又到月尾出糧無人理。總之一句到尾，你計岩條數你做緊的野係夠賺你人工再幫公司賺番多少，個人又唔搞事又唔比穫氣公司，老老實實自自然然你就係半個透明人，因為有穫氣又無你份，有獎頒又唔輪到你，所有野自動波老細都廢事搞你，月尾你就自然又有糧出。


呢種走位的態度係政治上真係非常唔正確，不過生存係今日的商業社會，好話唔好聽比你搏命去做，有信念咁堅持又點？賺多D錢咩又唔會多？到頭黎間公司又唔係你，搏埋條命為乜？不如慳啖氣自己靜靜地建立財務自由的事業好過啦。