完美風暴之猛火煎樓市

之前講到也許佔中最坏的情況係令香港民心崩潰而走資，但係呢家戴生又話要星期六日先佔，又話佔中都無意思等等，市場反應非常快，由25000點跌左幾日落番24600左右后，消息一出就急彈500幾點報復式上升，好明顯資金睇后市應該幾進取，如果唔係無理由單日整500幾點你嘆下但係只望26000 點的頂咁保守？


點都好，呢家佔中的形式同規模將會無咁壞的時間，隊長睇的樓市係接下來將會係一個幾亮麗的表現。首先，由呢段時間至滬港通出道的一段時間，睇黎股市會繼續上揚。我唔係股市專家，亦唔會睇圖，不過純以邏輯計之前講過全世界個股市都差唔多破晒07年頂，係香港同大陸仲係有九條街先破，只係如果你買中呢次個升勢可以破番頂住32000樓上，呢家現價仲有3成的上望空間，應該到時又會造就一班人發達。


先唔好理升幾多，但有北水經直通車落黎就係肯定的，有水入就有水出，cash out股市的人，我估都應該賺錢，或者賺好多錢，走唔甩又有一部份會係流入樓市。當然如果再細分黎睇，機構投資者未必會直接買樓，所以大碼野又未必太受惠，但相反一D散戶可能買開幾十萬股票，一個浪好叻叻執多一倍兩倍，你估佢cash out會買咩？咪好大機會又有一大部份人係買樓。咁今時今日一百幾廿萬買D咩樓？咪又係細價樓囉。


間接黎講，股市成交暢旺一定會帶動好多金融相關服務收入，即唔理你係ibank定bank定係經紀行，都好有機會過一下肥年。當2007年每日都貼近成千億成交時，D經紀搵幾L多錢我諗大家身邊有朋友都知。故此，你未必需要自己炒，但係只要你係同金融服務業有關，你的人工加幅或花紅，都可能會好金，一片好境下大家對前境有信心時，未置業的咪又係會想置業囉。


所以未來半年至一年個市應該係股市帶動下會有番好多動力，而更正的係一方面長遠黎講CY政府搞政改搞到七國咁亂，樓市的調控應該唔會再搞咁多野，亦無時間搞。再者，供應量我之前已講過，除左缺地仲缺人，講就話14 / 15年后會大增，其實落成量咪又係果一萬幾千伙，邊有供應大增呢？再加上最夢幻的就係20121026呢個SSD兩年期的大限，未來由10月打后，並唔係供應大增，反而係鎖死供應的時間，踏入2015年我恐怕樓市先係開始形成呢個股樓暢旺 + 供應大減的完美風暴。


如果你仲係唔知呢家個市有幾癲的時間，隊長再比多D信息你，副隊長今年初買的一個細價樓單位，240萬入，呢家銀行估300，市價應該係320左右了。而同屋苑計，細價樓的大單位年初只係290-300萬左右，但最新又創新高成左380萬了。同類型的租金仲過癮，舊年租出去250萬的單位掂到10000都好正妹，今年講緊搶到去12000了，一年同比升左20%租金。仲未認癲？琴日隊長亦去左得寶視察，成個屋苑無鎖匙盤呢D都唔係新料，不過如果成個屋苑firm賣的係得兩三間，間間都索天價，真係問你京唔京？


所以財爺同你講話怕有完美風暴，講真隊長都見到有，之不過大家睇到的野好似完全唔同，佢果個低氣壓好似長期都唔成型，但我見到的超級強風就一直打左好幾年，南轅北轍的風暴分析，隊真曾豪言細價樓係呢個浪會爆到上500萬，呢家都係300頭了，龜縮小小我諗400萬都係應該指日可待，反正財爺同我都係鳩Up，信唔信就貴客自理了。