浮遊於下一層樓之間

今日同人講起隊長的短期部署，隊長話呢家的時間係署於N和N+1之間，而呢家N+1實在太遙遠，所以好大機會隊長係選擇持盈保泰，享受下人生先算。


你一定即刻會問咩係N同N+1，N就係你有的物業數目，N+1就即係你的下一層樓。隨住政府出招縮樓按的時候，加上樓價飛昇，N+1就算因人而異，但大致上對於一個普通打工仔黎講，都係一個好長年期的時間。


當然如果你係一個上車客，打工仔，頭一兩層樓，其實都受惠係仲有9成按揭，同埋可做7成按揭之下，並唔係一個超長同遙不可及的年期。假使間你能夠一個月儲2萬黎計，我地以細價樓300萬為目標，第一個物業你用9成的話，當40萬埋單，你只需要係20個月時間。而假設你第二個物業係用70%按，咁你即係要借90萬+雜費+DSD，當你大約100萬先算，即你要多50個月，即大約四年。所以如果你要由零，去到你有兩層樓，又當你唔駛供仲keep住可以每月儲20K，咁你係一共要70個月，即5年零10個月，呢個年期其實都算唔過份。


記住以上係已經當你唔駛供款，實際上你攞住兩層樓黎供，要儲錢的時間已經難左，而且自住隨時要用你一筆錢裝修，老實講呢個咁完美的case又有幾可出現?


不過為計數而計數，當你有2層或以上的時候，你的N+1就好唔同了，因為好大機會你就要以50%黎買，即300萬的樓要150萬首期，加埋DSD同佣金，當你165萬埋單，要儲165萬，以2萬元計就係82.5個月，即係要大約7年，仲係只係講緊一層細價樓，對比起之前5年10個月可買兩層樓計，已經超出一倍。


7年其實真係咩都可以唔同，好話唔好聽跌就話唔駛7年可以買多層，但如果呢7年係咁易升多100幻，咁即係又要儲多50幻，即係又去多2年，呢D就真係真真正正追唔切，所以係今時今日的市況加埋按揭條任下，用樓黎做財務自由真係難左好多，甚至可以話係唔可能，因為如果7年先買多一層，老老實實一個30-40年的工作人生，你想買得幾多層？仲未計呢條formula，係未計你理論上會買大D的自住樓呢？


當然隊長之前買落，靠樓市升值同時機，係地位已經建立好個基礎，呢家升一升就已經輕鬆好多。可能你會話再升可以一路加按落去再買，呢條橋聽落又好似岩，但其實當你有幾層樓的時候，另一個bottleneck -->壓力測試就又黎阻住你，所以你可能都係過到初一，都過唔到十五，所以就算升左都未必咁易借到足夠的錢去加按或買下一層。


基於以上的限制，其實目前隊長睇到的係，由N至N+1，係可見的將來都應該係幾難甚至無可能，故此可能都係佑D樓自力更新，養到某一個位再隨緣隨時機先再諗N+1了，而係呢個中間的時間，反而就可能好好享受一下生活，也許係時候開始放鬆番小小長期涼美的洗錢模式，嘗試一下腐敗的感覺了。