樓市走勢分析: 佔中‧直通車‧SSD

有網友問我對於未來樓市的睇法，所以我嘗試以時間順序去講下未來幾個我都提及的重點，以去分析一下未來樓市的走勢。


首先其實本身而家的剛性需求係非常之強勁的，加上盤源好少，而且新盤都係中大價樓為主，所以係目前環境下，400萬樓下的按揭成數以及DSD都仲有優勢，所以係咁多個market中，細價樓將仍然受惠，但置於係咪一直升呢，又要考慮一下佔中的情況。


老實講去到今日，九月份開始佔中的運動似乎是無可避免要同北京政府有一個正面的衝突，從李飛的強硬態度可以睇到，呢家呢個袋住先的五成提名門檻應該係會硬通過，而民主黨同佔中三子亦表明會啟動佔中，雙方都唔讓步的情況下，究竟呢個政治事件會演變成點样，相信大家都無人知。不過本來隊長預期佔中對整体經濟唔會有太大形響，因為好多中環的機構其實都已經有contingency plan去處理一旦佔中所受的影響，所以好大機會佔中初期頭三兩日係唔會有咩問題。


問題係點样收科先係關鍵，係警察到場清場，定係北京政府稍稍讓步等示威者能有個下台階，兩個可能性都會月唔同的結局。當然最好見到的係，北京政府係意識形態上稍稍讓步，例如由5成提名委員會的門檻，降至3成咁，我諗慣於出賣港人的泛民，一定會借機抽水話爭取到一個較受普遍社會人仕接受的提名，因此就會解散部份佔中，根住我諗好多人個心都會散，佔中三子都可能會見好就收而和平散水。


不過我地中國的天威點會因為區區佔中而可冒犯，故此如果領導人堅拒不讓，CY政府呢D中央的犬牙，一定會強行清場。如果係咁的話，就要睇下清場時個秩序會唔會演變成天安門翻版，因為一旦示威者同警察係呢個漫長的佔中過程中稍一擦槍走火，演變成大規模衝突，甚至引出更多人的聲援，有可能就會越演越烈，到時收唔到科就會好大穫，最激的，甚至係解放軍提早收番香港都說不定，如果係咁可能好多人都會移民走佬，樓價可能會急促下滑都說不定。


如果香港人能夠逃出生天的話，接下來的樓價就又會較明顯，因為十月打后的樓市，將會受到滬港通的股市所帶動，恆指如果能夠暢旺上升的話，獲利的投資者總會有部份資金流入樓市。而正正係呢段時間，香港由進入20121026的SSD交接期，相信直到年底之時，好多盤都會比人消化晒並進入三年封鎖期。


因此，只要過到佔中呢一關，睇黎樓市都可以一路暢旺，而最旺的時間，應該係明年2015年的小陽春，到時的盤源狀態應該會仲緊張，資金又會好氾濫，睇怕都應該又會有一個較顯著的升幅。但係過完呢個小陽春，可能好大機會細價樓如荃中及得寶的入場費，會去到350萬左右的水平，而到達呢個水平后，如果政府仲係維持而家的所有招數話，好大機會升勢就要進入尾聲，因為上車的難度大左，換樓的成本就更高，到時可能到2015年底，只會有一個比較溫和如5-8%的升幅而己。