Project W 來龍去脈 (完)

呢幾日大家見我出Blog慢左好多，但又成日post d污水的相出黎，有部份讀者都已經估到係咩事，所以我就係度講下究竟隊長我呢期搞緊乜。


事緣其實７月有一間屋買左番黎做裝修，本身都係度研究緊應該點做，因為廚廁好似都幾靚仔，但廳房核突所以我就一定做廳房。之但係由於八月中又有租客認左頭，所以係有限時間下我就要決定係唔係放棄唔搞個廚廁。同師傅夾過D期的時候，最后都係決定只做廳房唔做廚廁，慳錢又慳時間。


過左幾日再上去睇進度，係用洗手間時我發現左個問題，就係水壓唔係太夠，同埋水帶黃有鉄锈的味道，於是我同師傅傾過，大家其實都明幾廿年樓係有呢D喉舊左生锈如膽固醇的問題，其實都無計。不過師傅提出多一個問題，就係水壓過細的時候，有機會唔夠壓力去撻著個媒氣熱水爐，呢一下可能就麻煩D。


果一刻本來都無意識到太多，之但係其實由洗完手到我番車場攞車，我感覺隻手的感覺好怪，好似好有D"鞋烚烚"多左層講不出來的野的感覺，再聞一聞隻手真係有小小鉄锈味，老實講隊長我真係唔係好過到自己，所以個腦都諗好唔好同師傅講要搞一搞條喉，即係忍痛做埋廚廁，不過番到屋企又無左件事，呢D野大家明。


坐左幾日，突然收到租客通知其中一間我無大執廚廁的樓話要退租了，咁作為業主都會問下佢點解唔租，佢就話因為要搬去九龍乜乜物物咁啦，咁我話OK la，而順便我就問下佢間屋住左咁耐有無D咩壞左啊要注意啊？佢就又答我話個熱水爐好似時有時無咁。頂，正正又係呢個問題開始click中我要去正視的問題。


如果牌面睇，買過個新熱水爐起碼3-4千蚊，兩間咪成7千銀或以上？呢條數點都要搞搞佢，如是者我突然諗起有日唔知係邊度睇到話有水管清洗的服務，咁我咪搵番果間公司出黎啦，但睇一睇佢地個價錢，洗一次要5000蚊+，我心諗如果洗一間都算，不過洗兩間就成皮野落樓，咪仲貴過我買熱水爐？之但係其實買熱水爐都係治標不治本，如果係水壓問題咁你再搞再搞都係要換喉，或者洗下佢睇下有無得救？


當然如果你係一個散戶，你未必會諗我諗的野，因為你可能諗的係一兩間屋，但我諗的係我本身買左果堆樓，如果層層要我洗都幾大穫，再加埋副隊長果D，以及我屋企親朋買果D，咁件事就真係唔化算，於是我就諗反正都係要洗，睇下買部機番黎又幾錢先？於是我就上網搵黎搵去，比較左台灣同日本兩部機，我就決定用台灣果部，因為明顯成效顯注，而且最重要就係有專人過黎幫我洗埋，咁我咪當係比個套票一次過勁洗我的樓之嗎，而且佢仲會教我地點用點洗，我呢D時候就緊係叫埋師傅同埋個浸大工程fd的班底一齊跟住學野啦。


經過左三日密集式的洗，其實有水喉工程背景的師傅班底都真係幾快上手，不過我作為行外人真係睇見佢地係度搞都唔知搞乜鳩，但係設定完成后我必需強調我理解的洗水管邏輯同埋成效係令我好滿意的，畢竟洗出黎的野真係好L核突之餘，水壓亦有所回升，而我認為如果你親眼睇過條水管有幾核突的時候，你會發現原來我地飲的水煮飯的水，真係會令你毛管起晒雞皮都似。


點都好，廠家今日回國，但師傅團隊經過密集式咁洗已經輕易學滿師，而機器到手后關心親友的我當然亦會去幫我的親戚全部洗一洗啦。


之后的發展，以大家知隊長的性格，都知道我會拍住師傅佢地去試下推廣呢個水管清洗服務ga la，一來我認為如果從我呢個投資者角度出發，咁我唔駛做廚廁工程，幾千蚊慳約十萬蚊工程就一定抵到爆ga la。而作為一個關心身邊的人，我睇完咁多層樓洗出黎的野，我都會覺得健康真係要從來水做起，唔係你真係幾難有一個乾淨衛生的家，特別係如果你屋企有小朋友有長者有病患的，就更加要諗諗了。


Anyway la，當我做廣告又好，真心假意話希望為你健康都好，好明顯隊長亦唔怕話比你聽隊長亦會想賺番個機的成本番黎ge，所以呢隊長將會好快推出全新的水管清洗服務ga la，價錢就待定不過都會同市場價差唔多，畢竟機價都有一定貴，同埋都要人工去做啊 , 如果你有興趣的話，不坊可以先Email / PM我先，


hkpower1981@yahoo.com.hk


再放送一張圖啦，呢幾支野係同一條喉由左至右不停咁流出黎，有綠色再變屎啡色再變奇異果色，如果你懷疑的話，我可以話比你聽入去的水係右手邊清水黎的，但出黎係呢幾支野，仲要我想講唔係得咁少，如果按量，每支色你起碼搵多二三十個水樽先裝滿，我只係攞左一少部份Sample出黎，你自己諗下恐不恐怖雞啦。