滬港通與大市

近日熱錢持續流入，股市繼續拾級而上，港股雖然前幾個交易日嘔番小小，但係整體向上的姿態都幾明顯，加上上證就更加強勢，呢個升浪似乎仲有排未見頂，有傳話係因為內地股民憧憬滬港通會激活股市。


樓市方面，成個七月成交量係兩年新高，價格方面亦都不停再不停咁破頂，有個別屋苑更加連環破頂，隊長呢幾日亦見證一單沙田細價樓屋苑的破頂成交誕生，睇黎而家股樓大旺的勢似是越演越烈。


一講到股樓呢兩個關係，其實都幾鬼微妙，有說話股市走在樓市之前，亦有人話股市跌樓市就未必一定跌，但股市升，樓市就一定有份升，呢個說法似是勉強得黎但又好似係事實，所以我就用左CCL的數據同恆指去做左下面個圖：

由有數據開始黎計，你可以發現其實HSI同CCL都有一定的似样，不過隊長真係statistic的白痴同懶精，所以我唔會再計confidence level的correlation la，之但係我都做左一個adjustment，就係將CCL的數據adjust 番去2星期前的HSI，因為CCL的數字係lag behind的。

睇番個圖，你唔難發現HSI同CCL都有一定的關係，不過HSI個波幅明顯係大D，像2007年時炒上30000點果支野，再2008年金融海嘯隊番落黎，果度去左6成野，但係中原指數就只係跌左25%左右，呢個可以話係由於HSI個liquidity大好多，所以普遍個波幅容易做到over-shoot的情況。

幅圖其實我只想帶出一點，就係似乎股樓兩個market係有著正關係，而呢個立論並唔難理解，因為我當你自己係股市執兩三球，最好的禮物又真係好似就係買層樓，所以股市旺帶旺樓市亦係一個合理的立論。

而如果你認同呢個立論的話，下一個問題就係今次呢個浪會升幾多了。今日的HSI以PE計都係12倍左右，其實真係好鬼抵，加上資金不停流入的情況下，HSI個市底應該幾強。陰謀論咁睇，如果你係外資，明知仲有兩三個月滬港通的錢就會湧入香港黎買貨，係有一條大水喉啡入黎的情況下，炒高派貨比佢地似乎又係一個幾令自己嬴硬的地步。

咁炒到幾高先叫高呢？睇番杜指2007年高位老早就破左頂升突左一成幾，對比港股2007年高位的三萬二千幾點，呢家我地連2007年都未破到。以咁低P/E的港股，加上咁多資金流入，個人認為要炒過2007年的高位應該不是夢，而破左的話假設當跟美股咁升突一成先停一停，大約即係36000點左右水平。

你可能會話，嘩隊長升到咁高睇得咁好，咁你仲唔借盡去買入搏殺？Well，我都係吹水佬一名姐，我深知股市唔係我杯茶，所以我最叻都只係係21600左右將我個MPF轉晒做全攻型，呢家等食糊。咁你可能又問，係咪即係等於乜野都唔做呢？Nonono.....話得比你聽股樓係關聯市場，如果恆指升到36000，即係呢家要升多4成先夠皮，咁你估下細價樓又會因為呢個滬港通大牛市而升幾多呢？

本來諗住年底賣一間樓，不過越睇越似一個大牛市黎臨，有樓的睇埋出年小陽春先放，可能出年黎近的唔單止係一個小陽春，甚至係一個大肥春都未定。