香港文明不再

曾經我一度自豪，香港人拥有較高的文化同文明水平，是相對中國其他地區有較接近國際文化的一個地方。係隊長跑大陸咁多年的時候，我亦經常意識到一些不道德的暗示，而我亦好自豪的同人說我唔會融入呢種國內的文化，更加係討論呢種「中國國情」之時，我亦講過香港人的文明度高，自我道德觀強，所以唔會有太多呢Ｄ不道德的事牽涉係香港人身上。


不過，近呢一兩年呢一種我曾經引以為傲的價值觀係以極高速咁褪色，本來只係以為因為有政治層面有利益關係，人先會變得咁不文明，之但係一隻無辜狗狗的性命，令仲天真到以為香港仲有希望的我，真真正正意識到香港已死。


狗狗未雪之死的發展，故事有著唔同的發展，但最令我感到憤怒同氣餒的，係睇到呢一個港鉄員工如何處理狗狗係路軌的片段，睇完后我真係接近崩潰，當中顯出成個地鉄的管理水平極低，前線員工無程序，道德水平奇低，連common sense都薄弱到低能的程度，香港人究竟怎麼了？


成個video出現的問題係好明顯員工係無所謂的訓練去做過捉動物離開路軌，而早前其實亦有網友提供過港鉄開放日的模擬片段，早已指出港鉄知道有狗隻係會進入路軌但都無任何措施去阻止，甚至認為狗狗死都係一件幾普通及應該的事，呢一種取態早已說明本身成間公司都係唔會重視動物生命，咁又點會有程序同訓練去教員工如何帶走在路軌的狗狗呢？


當然我明白有人會話狗狗唔同人，係無性的，會咬人，而且可能有病，Ok，我都明白，而且如果因為有動物進入路軌範圍就要停駛，一間入隻貓係兩站之間的無人地帶又停，黎隻雀仔又話停，咁日日都要係咁停，仲唔比市民鬧死咩？呢個現實的問題，我明白，而就呢個課題我相信有其他圍欄措拖可以做，但要討論的唔係呢個文章所覆蓋。最大的問題我想提出的，係而家就今次事件，就係有一隻狗，係個月台的路軌係可以救，而職員亦意識到係要停駛黎救，但就係唔知點解搞左咁多不合理的地方出黎令人咁髮止先係問題的關鍵。


所以係成個企業管理文化上，已經睇到港鉄無視動物的生命，所以無training就係意料中事，亦因此明白到當青衣鉄路中心同月台職員的溝通當中，佢地設一個時限去處理呢件事，亦暗示左呢一條狗命唔係一條命。換個角度，如果呢隻狗係你，你估港鉄會唔會仲有人開車先？我諗唔會癲到連人都唔理掛？


當然你話人點同呢？人就當然會停車，而職員就一定會捉住佢點都拉佢番番上月台，所以唔會出現類似事件，因此處理的時間同手法唔一样，呢個都合理。但又問題係，我就當呢家真係得一分鐘時間比你，果兩位港鉄職員都已經下月台進路軌了，亦已經走到狗狗的前后，狗狗沒做任何的反抗，係一分鐘之間我想問點解佢會選擇唔抱起隻狗上月台？換個角度，你有一分鐘時間，你落去唔係抱起隻狗，我想問咁你落去做乜？你想用一分鐘令隻狗跑去邊定點？我真係唔明，如果你係無勇氣抱起隻狗的話，你落去二十秒再上番黎做咩？如果你話隻狗咬你就算，但隻狗真係無任何攻擊的動機，我真係唔知果兩個人落去想點？咩邏輯咩common sense都無，我地香港人的質素變得如此低，點解？


又有人會話，真係有人好怕狗唔敢救？咁點解怕狗的又落去？唔怕的有位女仕都伸手出去想救，但係月台就快L到即刻叫個女仕唔好超出黃線？個女仕唔驚狗，你又唔比佢救，你驚狗，你好似去救又唔救？屌我好L亂啊，咁比唔比救姐？係唔比就咪L停算啦，唔好又延誤十分鐘，有人救得又唔比救咁，搞到精神分裂啦我就快。


從心理上黎講，我相信作為港鉄職員，大家都知道一通車隻狗狗係路軌都係九死一生。而正正係呢一個考慮，其實果一下呢兩位員工的心理狀態，都知道你唔夠膽伸出援手抱起佢，佢就會死係列車之下。呢一個心理的考慮，係人性的考驗，而呢個考驗，唔係比一個人，亦比一team人，而成team人都可以妄顧一條生命就咁白白被殺，這是一個連稍為有惻隱之心的人都唔會接受到的事。一個舉手之勞都唔做，香港人成日怕大陸果D妄顧生命的行為，咪又係五十步笑一百步？



最慘的係港鉄又承集左呢期最流行的管僚文化，唔認錯唔問責唔講道理加隠暪事實已經變成正常流程，而當真相被撕破后，相信又只係會再玩官腔，無人會受責，呢個就係今日的香港，問題係唔需要處理同面對，只需要推卸開去就當處理了，我相信結局好大機會不了了之，因為正如今日我同一位港鉄員工討論時，佢亦指明有內部的同事係認為"只係一隻狗而已，駛乜搞到咁大穫"？一個連自己衰乜都唔知又唔認的機構，點查點鬧都唔會有用，而且今時今日香港的社會，無恥就係無敵，你想要公義？講呢D.....。


隊長認為如果係正面回應的話，其實蘋果都已經幫你查晒，好明顯而家地鉄對動物的價值感薄弱需要檢討之餘，是次事件的青衣中心主任，以及前線的地鉄員工都應該出黎公開道歉，先係一件負責任的事。再出memo，或搵MTR的公關或老細出黎去擋，係無意義。不過呢一種有公義的行為，在香港已經變得十分稀有，原因係香港由上而下，早已吹著一股歪風了，香港人再多一單，又有乜所謂？