柒租記

今日經歷一件異常柒事，所以要寫篇文自己紀錄一下，以警剔自己以后唔好再做on99的事情。


話說隊長我本身都係一個三星鎖的粉絲，原因係每次換租客時個客換鎖又要搞呢搞路咁，係一件幾煩的事，特別係當你有好幾套樓要跟蹤的時候，你開始就會要有一套管理鎖匙的系統，如果唔係都幾鬼亂，行路個褲袋會好鬼重。


相反，度門裝左個三星鎖，比人第一下個印象都係好好多，多多少少係有一定的暗裡增值的感覺，特别係后生仔女一見到一定會好開心，呢個亦係一個令自己單位突圍的好方法，畢竟一個鎖都係二千頭，連裝工都係三千左右（隊長我唔駛錢裝 ....哈），你係租金叫多二三百就返本，又有實際效益，絕對係裝得過。


不過正正係裝左三星鎖，有時就會大意，像我今日去交樓比租客時，就話出門就出門，因為前幾日收樓時我已經檢查過入層係無問題，所以約個客三點我就三點去開門，點知好衰唔衰唔知邊個阿姐咁好手尾，門鎖係無問題，但個鉄閘就無啦啦比人關左!!呢穫真係杰，本身我個鉄閘不嬲都係唔關的，但唔止邊個隔離鄰舍玩野，定係保安見我無關咁好手尾同我關左，仆佢個街個閘係自動鎖的，一關左無題就死人，睇住D租客西晒面，我都勁唔好意思。


你可能會問，咁我應該有鎖匙的嘛？有係有，不過我又懶係靚咁將D鎖匙同張三星电子咭排到靚靚咁放係屋入面，而我又真係唔記得我屋企有無keep copy，即係就算飛番去再番黎要九個字都係有機會白行，於是我就柒晒咁局住叫番D租客落大堂涼下冷氣，我就衝去個管理處求救搵鎖佬啦。


攞到电話后打去，鎖佬好爽快15分鐘就到，問題就又黎料啦，大家都知我個戶口又試玩到得番1000蚊，而其實梅過梅菜的我現金得百幾蚊，屌那星呢個真係唔係隊長一貫的作風，本來諗住入屋租客比租就可以緩和番個財政，但呢下搞一搞個鎖又要駛多我幾舊，仲要係我身上無的幾舊，但係呢個時候我又唔可以咁失霸氣叫個租客幫我比住先ga ma，局住又要跑狗去最近的櫃員機攞埋最后的幾舊出黎，一來一回跑左我十分鐘，都唔緊要，但最慘係跑到我成身大汗像隻狗咁，夏天搞呢D真係攞黎衰。


好啦，番到間屋個鎖佬又岩岩到步，我緊係叫D租客係下面等廢事大家企係門口局冷氣（谷L氣），我同鎖佬上去但鎖佬都似65后，呢位長者係我度門度好似打飛機咁搵條萬能匙chok左成十幾分鐘都開唔到，我心諗呢穫閪啦，於是佢又變陣攞條鉄出黎嘗試去勾個門開關位，咁我見佢好辛苦係度撩我都試下幫手，開埋手機電筒同埋幫佢抶住塊鏡，搞左十幾分鐘后終於撩到，但果下我發現我仲大汗過阿鎖佬，但都拿拿臨比錢佢埋單算數。


一搞掂就即開冷氣，然后call d租客上黎，佢地上到黎就自己驗下樓咁，我就捉住個女人教佢改咭同改密碼。可能到呢個位其實我個人都已經溶左兼亂亂地，咭我重設了，但係個密碼我又唔記得點改，同個租客玩左出門開門關門十幾次，另外個租客都忍唔住出聲話你都好慘，今日比兩個鎖玩左成粒鐘咁劑，呢個時候我都忍唔住嗌投降，我話番屋企睇番說明書先打番比你點改密碼，反正你鎖左鉄閘我都唔會得閒再叫個鎖佬黎爆你門la。


其實就好小事，不過搞左我成個下午，本身一件nice and easy的事，諗住收番D租幫補家計，但都要整穫杰的我嘆，收租佬真係唔易做。