金融才俊 (3) [完]

講番金融才俊，其實果一份自我感覺良好的澎漲的力量，有時真係會自戀自大到令人作嘔同反胃，而有時更加會用錢去衡量一切，將自己放係一個神的國度。


又有一次一個朋友途經尖沙咀廣東道附近，大家都知呢D放工時間條廣東道就一定人多車多，塞車都已經係一件幾當見的事。不過今次的事件，係見到一架接近過百萬的名車泊左係一邊，后面因此塞晒長龍，而警察亦到場嘗試聯絡司機，係電光火石之間一個年約三十歲的司機就出現番想攞番架車。


當然呢個司機就係今集的主角，佢一身打扮就知係一個保險業的造型，而佢手持一個保險的文件夾，都好大機會係一個保險的金融才俊。當阿Sir問佢點解泊架車係度，后面見唔見已經造成交通大擠塞時，呢位才俊就話佢因為唔舒服所以泊低架車坐左係側邊咁。當然阿Sir唔係一個智障的人，你係唔舒服泊低架車，后面塞到仆街，係正常人都唔會咁做，仲要你呢家阿Sir一黎你就咁精神，於是阿Sir唔理亦要照炒牌。


呢個咁唔俾面的行為，金融才俊就覺得好無面子，於是佢就開始上身，「炒咪炒囉，你炒快Ｄ啊」，而講講下就更加頂癮，「你個死PC仔，你知唔知我搵幾錢一年啊，我隨時交稅都等於你成份人工啦死差佬，我地呢D納稅人就係出糧比你呢D死PC仔ja」。當然係呢D時候，圍觀的花生友就越來越多，而我朋友當然係其中一個。


其實我唔在場，所以只係能復述呢一件事出黎，但呢位才俊如果係以佢交稅都等於個差佬份糧，我當岩岩入行的PC搵20000-25000，一年30幻，咁佢交得30幻稅應該都係兩三球人工左右，當然當中有無水份就無人知，而且計唔計預繳又double左件事，不過老實講都係搵三兩球一年姐，你話係咪好多，咁打工仔黎講算ok la，但有錢過你的人大把囉，而且呢D咁無厘頭的事，其實關你搵幾錢咩事先？


有時人就係好得意，當一個人的自信係來自錢的時候，有一D走火入魔的人就會自自然然用錢去衡量一切，包括佢認為可以用錢去買起所有的野。當然我唔會否認有錢可以買到好多野，但的確有時錢係唔能夠解決問題，更加唔係一把尺去量度事情。就呢一件事黎講，其實自己都已經蝕章，何必仲要係度講埋D廢話係度丟人現眼呢？有錢，並唔係大L晒的，而且我再三強調係香港搵兩三球真係唔多，如果無就仲搞笑，何必夜狼自大呢？


一連三集的金融才俊想帶出的係，其實好一部份所謂的金融才俊，無論係專業上，行為上，操守上，與佢地的收入同所謂的專業都唔係太相稱。好多時隊長遇到呢D才子之時，都會留一手睇下佢地咩料，特別係有時摸摸下底之時發現原來只係一個笑料，感覺真係覺得呢個世界乜人都有，而更奇怪的係好多女仔又會以為佢地係神，真係吹9漲。


有時真係要用雪亮的眼睛看世界，先會分得清勁人定柒人。