金融才俊 (2)

如果只係搵到錢就可以justify你串的話，我認為至少你要搵一個錢，係一般人成世人都搵唔到的，咁先開始串亦都吹你唔漲，舉個例之前隊長講過一個普通人一世搵幾多錢，係唔超過5000萬，甚至3000萬，咁你的年收入係有咁多的話，果種自我澎漲的虛榮感令你已經睇唔到人亦睇唔起人，我係明白的（但未必認同）。


但隊長我相信就算金融才俊搵錢再多，搵到呢個錢的人亦只係極少數，而特別係搵到一兩球的，就已經自己感到舉世無雙，係一件幾井底之蛙的事情。


另一位我認識的人物，係一位朋友，話說佢細過都唔係好讀得成書，去左外國番黎都係搞唔掂，總之讀左Ｄ唔知乜然后就加入左某保險公司做financial planner。短短兩年，佢好叻仔，據說已經搵百萬年薪了，而由於呢位朋友其實只係D世交auntie的兒子，一年其實見面都係果三兩次，而呢位百萬年薪的年青才俊，亦有那一種唔不洩與你交談的味兒。


當然D auntie又緊係會互相比較，佢媽媽就緊係呢家意氣風發，因為之前讀唔讀得成書已經唔重要，而家搵錢搵到仲唔出人頭地咩？正所謂乜仇都報晒，佢阿媽就話佢個仔咁叻仔所以買左架50幾萬的Benz楂下咁喎。而其實最近的更新係佢要結婚了，搵百萬年薪的佢，出左架Benz諗住佢都會係大宴親朋啦，而我無估錯佢真係九龍某五星級酒店擺，我阿媽同我講時我都無乜感到突然，始終咁上下收入就一定係搞靚佢ga la。


不過吊詭的地方，係原來佢所謂的擺酒只係請你去五星級酒店食lunch buffet，咁我的預期係都唔緊要啦，有D人中意擺下午慳番小小錢嘛，大家后生仔我都明，我多多少少都認同呢一點的，於是我出席當日時，就問我阿媽去邊個廳度食啦？點知，原來我的預期同我的了解原來真係有點出入，呢位百萬年薪的青年才俊，原來真係叫我地去食lunch buffet....酒店入面的lunch buffet......只係book左幾十位的長枱的lunch buffet而已。


呢一個咁潮的行為，老實講我睇唔通。我假設一個Lunch buffet head count係400蚊，我唔明點解唔搵間酒樓求其搵個良朋共聚宴3888全包咁食左佢算，衰衰地你Book三四圍都有個廳或大包房比你坐下，隨時仲抵過你去五星級酒店食lunch buffet啦？呢家我地一家大細比你叫黎五星級酒店，又要做人情，你又攞晒彩同人講係五星級酒店結婚，我睇見要佢兩公婆係幾十個親友同過百位社會人仕（即係唔識的人）見證下脆低斟茶，我望唔透，我唔明點解呢位百萬年薪的朋友會有咁特別的安排。


離開后，我問番我阿媽呢位百萬年薪楂Benz的朋友係咪好唔掂，之前欠落好多街數，定係佢好捱得想捱個首期出黎或買左樓要慳咁？而一向佢屋企係中產偏上的收入同資產黎計，據說佢無諗住買樓，結婚后就一齊住番入同一個實呎600呎左右的三房單位，大家繼續共享天淪咁，話之而家已經五人一齊住，黎緊年底仲會變六人，都無乜所謂。我問我媽我話以佢咁高收入，點解唔買樓，又或者咁情況，租個單位住住先都得？據聞就係佢地答話而家樓價太高，唔合理，所以百萬年薪都好，都一齊住住先咁。


係隊長眼中，呢位金融才俊如果自問收入咁高，平時都帶著果股氣場，點解一個婚禮會搞得咁得意呢？如果係為左層樓的話，咁點解又唔係買樓或租左樓住呢？而如果係一味想慳的話，咁又點解會走去買架Benz每月去燒錢呢？我望唔透，或者隊長我本身無佢咁高的智慧，不過面對住佢呢個Case，我不禁倒抽一口涼氣，因為如果佢的自我澎漲的認知係由佢的收入，而佢的收入係來自佢的專業智識的話，呢個財務智識的貧乏，真係去到豬肉佬賣豬肉比阿姐一样的層次。


一個無需所謂專業的financial planner，掛住個保險牌比個funds你自己揀portfolio郁下d　percentage，開到單咁就話係financial planner，老實豬肉佬都做到啦。睇一睇呢位金融才俊的portfolio，未買樓就先買車，每個月就比架車閹走幾皮野，如果係佢sell我，我真係一額汗，可能係我調番轉頭sell佢都未定。


所以有時才俊的背后，果份自信真係唔知係邊度黎？百萬年薪又唔係多，累積的財富又無，專業的智識又貧乏，說穿了只係一個sales佬，但係出到黎就一副看不到人的咀臉，有時真係唔知好嬲定好笑。