金融才俊 (1)

琴日同副隊長傾起其中一位相識的人物，係隊長的印象中呢位人兄氣宇軒昂，有一種自我感覺良好的氣場，不過隊長我並無機會交談，只係一面之緣的一個粗疏的感覺，也許佢真實性情係極盡nice的人，但當隊長我講完果一個氣場的感覺時候，副隊長就帶出呢位人兄都係專業人仕，年薪過百萬，所以如果要串，都串得起，亦係理解。


去到呢個位，隊長我腦中不停然諗起好幾個關於金融才俊的故事，所以會係呢個系列入面再慢慢分享。之不過，generally speaking，而家所謂的金融才俊的自視咁高，係因為品牌效應，定係人工高，定係個文化，又亦或係本身個性格係咁呢？隊長我覺得真係好值得研究一下。


回想番好幾年前當隊長都未成魔之時，那時可以話係用醉生夢死黎形容，每個星期一定有三兩晚係落bar飲野或有局之類芸芸，因此亦識左好多飲野的朋友一個帶一個咁。話說某一年的party係灣仔某酒吧入面有半場係我叫黎的人，係場中飲野之際人撘人咁，就有兩個西裝友出現，咁帶佢黎的朋友自不然介紹我呢個搞手，而呢兩位朋友雖然睇样都係25-26相對年青，不過就有果份睇唔起你的氣場出現，但都因為搞手的身份，佢地簡單的打個招呼，然后就從西裝口袋一人拿出一張咭片比我，上面寫咩title我已經忘記，不過一個清晰的公司logo -- "Morgan Stanley"就清楚咁印係上面。


講真我到呢家都好記得，果一刻張咭片，並唔係真係派比我，而係想係在場其他人身上攞到眾人的共識，反映出"佢係ibanker"條件的事實。其實我已經唔記得左呢兩個人個样同名字，亦唔記得佢地有無識到咩人定點，但我仲好記得果晚除左收咭片果下有交流過之外，之后成晚應該都無同佢地講過一句野，而幾年后我仲只係記得佢地公司名而已。


所以一個好現實的問題就係，你做間公司個名夠響，話之你係入面係大老闆定係洗廁所，其實對於某D入世未深的人，特別係某一部份女仔，其實真係唔係咁緊要。係大眾的認知下，做得ibank，也許就係人中龍，高人一等，又搵到錢又醒，自不然就好似令佢地自我信心都澎漲，亦難怪佢地其實就算個人黎講唔係咁出色，都會自我感覺良好。


問題係如果放低左公司品牌下，其實係咪佢就係一個叻仔，就係一個搵到錢的人，而搵到的錢又係咪值得咁自我感覺良好呢？我又覺得係一個人的眼光而已。老實講百萬年薪呢样野，隊長印象中第一次接觸應該係98-00年的時代，果時講D人百萬年薪就好似好勁。不過十幾年后的今日，百萬年薪又係咪咁勁呢？隊長我就認為一點都唔勁。


唔用數字去講，我相信今日的通漲物價都高於98-00年，而人工的收入，特別係較高薪的，之前都講過係比平均人工收入要高。隊長認為比你百萬年薪本身已經好多人有，就算你打工搵百萬，一世人都係搵果四五六千萬左右，連個億都沒有，其實有咩咁巴閉值得自我感覺良好呢？係隊長眼中，年薪二百萬都未值得自我覺得係叻，並唔係話唔叻又或唔夠洗，之但係你真係要串要睇人唔起的，就唔好做一個假富豪，身家連個億字呢個基本小富豪版都無緣做到，又學咩人出黎扮勁扮老細呢？其實說穿了，你我咪都係一個打工仔，大家又唔同行業，其實一個人的基本尊重咪夠囉，何必感覺自己比其他人高一點呢？如果你認為搵錢勁而勁的話，我相信搵得比你多的人，亦可以做得比你更好更親民，而且一山還有一山高，係唔係有錢過你的人，就可以到時睇唔番你起呢？其實人都只係好簡單，同人溝通多一點尊重，呢個世界係好美好的。