白日夢想家(上)

呢幾日先后有兩位朋友和我討教樓市, 一位就係完全零概念希望了解上車係咩一回事，而另一位側有晒買樓經驗希望財務自由，不過係午夜夢迴之際，卻奇怪地覺得兩個人都有一絲的相同。


先講零概念的朋友，最近看到遠晴放賣，由於家人都係住港島東一帶，而亦三十出頭的佢亦勾起了開始要在人生展步，所以就問我意見。由於當時遠晴未出價單，所以我第一時間問佢的筆直同首期有幾多先，以及了解佢的上車步署。一講筆直之后，佢就話大約350-400萬左右，而首期大約係一成，即40萬左右啦。


一聽到呢個位，我個心已經覺得有D唔係咁計到條數，因為以我認識的呢位朋友，收入應該不高，但屋企應該算係小康家庭，我本來是以為佢屋企會比一百幾廿萬佢做首期，所以先諗350-400萬的樓，但如果只係40萬，我開始已經諗緊負擔問題，所以我就問佢你的人工介唔介意講一講比我聽？其實朋友間收入都係一個比較敏感的話題，不過佢都唔介意講比我知佢的收入係萬零蚊。去到呢個位，我已經忍唔住要問佢，我話其實你知唔知買350-400萬供9成要幾錢一個月的呢？佢話唔知，無計過啊，零概念咁，我完全覺得真係啤。


作為一個成日計數的Blogger，我同佢講先唔好講過壓力測試，即銀行借唔借錢比你的問題，就只係話呢家你搵呢條數，但係供350萬的樓咁講，係咁易都要供12000-13000蚊一個月左右，咁你點供啊?佢就話其實佢諗住同佢女朋友一齊供？呢下我就又要問佢我話你同你女朋友其實係咪已經認定先，咁一間你地有咩事，你一個人點頂啊啊？當然你出事你屋企人都唔會話睇住你死的（據我所知佢係大家族，咁一人一月出二三千都幫到佢），但係你未來30年真係唔停得做野喎？


去到呢個位，我感到呢位朋友比我打沉左並有小小唔係太奈煩，始終佢會覺得買樓可能係一件太煩的事，而仲要比我搞到佢諗的計劃全盤打消，心裡就始終有點不是味兒。不過我作為朋友，煩都要問埋個尾，我話其實你的人工唔好講呢家點供先，仲有兩個問題係關鍵的，就係第一，你諗住用邊個名買？因為你呢個人工就算你堅持話想供，銀行都唔會借比你。而另一個問題係，遠晴係咪真係350-400萬有貨，無人知喎？


供款方面，佢呢家原來又有新諗頭，就係用佢妹妹同埋佢女朋友聯名買？我其實開始越黎越摸不著頭腦佢諗乜，不過係呢個時候佢就識問番我要幾錢收入先借得到？咁我話總之個收入大約就要22000起就應該供得到12000-13000蚊的野啦，咁佢話因為佢妹妹收入較高，所以OK，而其實呢一刻我開始感到佢的耐性已經差唔多用完，所以我都廢事再深入探討單名上，同埋佢呢家又搞到阿妹影響佢阿妹自己將來買樓的問題，所以又係時候轉一轉話題。


我同佢講其實遠晴呢個單位，係港島東地鉄附近，我唔係好記得實呎幾多但萬四五蚊起步都唔係一件過份的事，即係你好大機會見到都應該係四球頭入場，除非佢有個別單位對住垃圾房之類又一樓，先可能會係賣到特別地平如350-400萬比你，不過比呢D單位你都係死路一條。再者，我諗個實用面積咁細，但你就買到咁高樓價，我就當你屋企人揼水比你買，你買左第時好大機會又係落后大市，而且你住個細單位真係要搬大D果時，你層樓又唔升得多，你個財富效應又無埋，仲要供到隻狗咁冒咁大風險，老老實實我真係唔建議。


相反，我話其實係早幾個月（大約2014年2-3月)，即佢話買樓的第一次，我已經叫佢去睇下得寶或者沙田大圍呢堆，果時2.5m - 3m都仲有貨揀，你起碼供平二三千一個月，我感覺上其實都叫夾硬黎，但夾硬得黎起碼都叫夾硬到，相比而家我都唔知佢點計都點搞，而且只計及佢人工我真係覺得3.5M+的野唔駛諗，所以我還是建議佢去上述區份再搵搵。


可惜就算到呢一刻我已經說明左佢未必供得起（客氣地），但佢還是回贈一句佢想住番港島東，因為屋企人係呢邊，而佢又想住新樓，因為舊樓太殘又要裝修又隨時大維修咁，我已經知道呢個又係一個死局。當然我無可能一句劈埋去就話你無咁大個頭就唔好帶咁大頂帽，不過正正我就覺得呢件事發生緊。


我作最后衝刺講就算我人工比佢高，樓市上賺錢都比佢多，屋企人住港島的我，一样搬入去元朗住兩年，而我相信你好大機會叫你住元朗你會一口拒絕，但兩年后情況好了，我一样搬番出九龍，都叫做搬近番市區，其實有時有D野都係要捱一捱，我比你相對有能力都走唔甩，你都可能要諗一諗係咪要搬去平小小的地方住下先。可惜去到呢個位，耐性已經用盡，我亦唔好意思再講。


幾日后，一個whatsapp傳黎，一張遠晴的價單，一個喊的emoticon，相信呢個option是行不通的了，而究竟佢諗唔諗得通，就要靠佢自己了。