裝修出租的思維

相信好多人都聽過話出租樓唔駛整咁靚，總之個裝修慳得就慳，到最后有人租就OK，簡單如有時只係一天一地，即油番間屋做過地板就OK，甚至有時做D野俗稱化妝，然后就租層樓出去比人等等，簡單黎講就係要賺到盡多點。


隊長早期其實都係有呢種諗法，始終住又唔係我自己住，你整得再靚遇著D人唔鍚身，兩下一样又會幫你整殘佢，所以衰D講你整唔整好D都係一样，咁當然唔整就慳好多錢，尤其是其實裝修係一件幾煩的事情，好容易呢度就幾百果度就幾千，加加埋埋就幾萬好容易。而且，有時D野又牽一髮動全身，即你搞得個水喉就無理由唔做過個廁所，而你扑得晒D磚又無理由唔做埋個電咁，但咁諗好容易又由幾萬蚊野變十幾萬數，所以好多時都會面對兩難。


其實好多初級投資者都會經歷呢一個期間，但係慢慢你就會發現原來cheap到底到最后只係會搞到你自己，因為之前都講過好多時呢度壞果度壞，下下搵你呢個業主去煩都唔少野，再加上如果你有幾間甚至十幾間樓的話，真係會煩死你，所以隊長我計數上都傾向係長線投資，希望以長線的回報來收反個裝修。


換句話說，有時我覺得收租佬都有佢地的價值，因為收租佬如果係唔cheap果批，佢地會真係執番好一間鬼屋去變番一間好有質素的屋，特別係響一D比較老有二三十年樓齡的屋苑，仲要係細價樓果隻，好多時D人三四十歲住入去就成世，到賣比你果時佢地六七十歲，間屋幾廿年無維修無裝修，水電其實都已經又霉又爛，無我地呢D人買左幫佢翻新，真係唔知會唔會住到出事。


引用呢家隊長裝修理念，我盡可能真係做番好晒所有野，由頭做過就由頭做過，成本有時真係高到唔合理，但問題係你整到咁靚D人唔係傻，隊長抱住一個心態係乜野質素的樓其實就吸引到咩人。你要有質素的人，佢地就唔會住一間爛樓，反之一個cheap人，就唔會比高市價的錢去租間靚樓（租霸除外）。故此，你能夠有一間勁似样的樓，其實係marketing positioning黎講係一個舊屋苑入面係無乜對手的，本區的引伸家庭果D后生仔，一般都願意比多10-20%去租間靚樓，有要求的人一定搶住要，拉長黎講你個租可以嗌高10-20%，個裝修就三五年收得番，總好過你攞住間爛樓，比人挫到你要market -10% 至-20%，其實條數拉長番一样計得通，問題只係你願唔願意比呢舊大錢。


所以隊長其實開始越來越唔buy化妝的技倆，始終有D野自己知係過唔到人，而且如果過一兩年又係要執過的話，化妝的錢仲要蝕番轉頭，對自己以至成個社會都其實係一件幾浪費資源的事。


但題外話，講到裝修，隊長最近同某大學的工程人員研究緊一個新的項目，如果成功的話就真係一個幾大的突破，相信會令裝修慳好多好多錢，而家就先稱之謂project W先吧，我會用呢個project W去試晒我所有舊樓的工程，如果成功再向大家報導呢個創新的技藝。