白日夢想家 (下)

大家睇完上面兩集，其實大致上都有個概念知道發生乜野事。


兩個主角一個就完全無概念，但犯左一般年輕人的毛病就係咁貴咁遠，但又唔理自己的能力其實唔知自己買到乜。而另一個，在於係隊長自己的認知下，認為透過股票可突圍，再套現成為樓方，看似好有策略，因而定下一個極高目標，實際我認為兩位都是有發白日夢之嫌，不切實際。


我並沒有踩低或攻勢的意思，之但係我想提出的係財務自由道路上，如果你未有概念的，就當然要學好，了解以及明白再應用如何令人生可以起步。而當你應為自己真正明白的時候，我又希望讀者能夠以平常心，穏打穏紮咁一步步達致一個可持續發展的財務自由計劃，以及務實咁設定一個合理的目標。


舉個例，如果你係得果萬零蚊人工，面對今日的樓市，老實講根本輪唔到你去嫌三嫌四，放大雙眼睇比你有能力的人大有人在，你生存得起香港搵低人工，就必需明白你唔會買到D咩靚樓，好話唔好聽你買到樓都算叻仔，所以根本無乜野好猶豫，要買就買果D平樓係就唔甩的，無錯果D就係咁細就係咁舊就係咁遠，你要嫌的話，可能遲小小連果D雞樓你都買唔起，咁如果你話非靚不買的，咁無問題你可以唔買，繼續原地踏步，不過就唔好冤什麼，因為社會並沒有欠你什麼，只係你有機會時沒有把握而已。


不過比呢個買雞樓或唔買更大穫的選擇，就係扭盡六壬又要出阿妹名又要同女朋友夾，兩個人頂磅頂到爆晒咁黎供樓，如果係買層二手大屋苑我都仲算，你好衰唔衰仲要揀新樓單幢極細蚊型單位加超高管理費？真係比你買到的話呢D咪叫做慘不忍睹＋慘不欲生，自己就供到爬係度之時仲要層樓可能勁落后大市，病又唔敢唔番工，一間同條女散埋就成份糧掉落去供樓？幾廿年的光陰一個決定自己KO自己咁衰的野，聽完我真係好驚。


而另一個有了解過的人兄，其實都唔好講股市果part，我只係用人工去制造現金流呢件事已經覺得嚇一跳。試諗下如果你搵兩萬銀，但你的目標係造六萬銀的passive income？嘩咁咪好過番工？屌當然係好過番工啦，問題係如果人人都可以搵兩萬造六萬的passive income，呢個世界仲有人可以番工ge?


可能你會challenge話隊長你唔係話passive income用時間黎換的咩？咁當然啦，用時間拉長30-40年，你再計埋通漲就6萬可能係一個可行的樓，當中可能仲包含左你人工加幅去買多幾層樓咁。之但係如果你認為10年可以做到的話，理論上一個正常人我可以話係無可能。事實上，你搵2萬，用10年造2萬passive income，即兩層600萬的樓供滿，其實都好L難，比較合理的係可能10年做到你人工一半的passive income，已經係一個好好好超額完成的壯舉。唔信，我當你唔食唔駛，2萬 x 120個月都係240萬，仲要計你儲到咁上下錢先可以買到層樓（3,5,7年），然后先可以供同租出，就當你有人工加，咁你食唔食駛唔駛先？


當然話說番轉頭，咁你話如果股票真係幫到手咁點計先？Well，咁我都可以比番個財務自由的1個月大計你，就係去買六合彩，中左個金多寶頭獎一人獨吞3000萬，然后買十間八間細價樓，登登登登搞掂！！財務自由了！！屌如果真係我同你講一D唔係正常人可以做到的野，你都唔好睇我個Blog la。我已經講過好多次，股票要發達，唔係無，不過真係好少。而如果你認為你只係會win唔會lose，咁我覺得你唔需要買樓，或者買一層自住都夠，因為無謂放晒D錢係樓度阻住自己去搏殺，但最怕的我其實係怕一個股災就同你清倉，你所有的春秋美夢一晚就同你燒左佢，呢個先係唔合理的地方。


其實財務自由係一個方法，每個人只要有一個正常平和的心，唔好不切實際咁去做，十年廿年三十年總有小成，我希望大家能夠用正途，以正確的認式去實踐，先係關鍵。股票唔係歪路，之不過如果你有閒錢玩，作為副業，是無傷大雅的。但如果你以股票為主力的話，這已經顯得財務自由的路，有機會已經走偏了。記住，穏打穏紮穏陣先係成功不二法門！