賺到盡？

老老實實，如果可以的話，有邊個賺錢唔想賺到盡？即係話，用最少的成本，賺最多的錢，最好就一蚊都唔駛比，但就賺到你最后果一蚊。不過，呢一種思維通常都係一個失敗的人的諗法。


隊長做人一直抱住一個態度就係錢就係預左要比人賺，你用得人地的服務同產品，你就預左要比錢人賺。世上無免費的午餐，你也許可以攞到著數一次兩次，但如果你次次都只係諗住搵著數，個朵就遲早會嗅，而嗅朵就唔會有人再幫你做野。


舉個例，比如同我做鐘點的姐姐，一般佢地都會做多幾分鐘甚至更多才收工，而隊長一般都會比多幾十蚊tips佢地。將心比己，試下比百零二百蚊有人叫我做家務，我真係未必肯，所以有D野我都希望好黎好去；做裝修時，我通常每一期都會提早比錢，一來人地做得專心安樂D，二來因為夾開，我比錢準時梳爽，亦唔會同個師父爭拗尺吋問題再克扣錢，師父做野因此都唔會甩漏；買樓時，比佣我永遠唔拖，要比我就又係盡快比，亦唔會玩野叫個Agent走幾廿轉，亦就算有時新Agent幫我做野跟得差，我都唔會學有D人諗點样投訴減佣之類；講真你無好野益人，人地又點會幫你做好D?有荀野又點會益你?


也許係職場上你都會明白，你老細對你唔好，人工又屎忽，你又點會安心係間公司度真心為佢服務呢？無得揀就局做姐，有第二份好工你唔跳？換到你做人老細Manager，你對你D靚真心的，佢地自不然跟住你，你屎屎忽忽的，又唔係比到錢，到有好路數咪一样會走。有緣走在一起的，你幫佢，佢服你，咪有得一齊合作囉。如果講真大家係陌路人，比如你試下一入去睇樓講明你唔比佣，你估有無人陪你癲？有的你都唔好去啦，預左佢同業主都會Fd過同你，輸價都輸番死你。


當然每個人有唔同的選擇，有D人天生就係唔識做人，有D人天生就只係想搵人苯柒，但我只想講如果你係以上呢兩種人，都好難做到大事。我唔敢講話你完全無機會發達，但機會一定比人細，因為你身邊好難會養到一個真心幫你的團隊，你叻極通常都只係食到一兩次著數，人生也許打份工然后食到一兩次好樓就係咁多。


所以做人的野自己諗，我相信睇得我個Blog的讀者都有番咁上下財力同能力，又有番咁上下夢想，但要成功記住除左你自己的眼光同實力外，更重要的係你明白你成功一定會有其他人幫手先得，而你得到幾多，亦要睇你付出到幾多了。