講樓買樓反映一個人的心理成熟時間

唔知點解，我身邊的朋友是極度走向兩個極端，一批就係會買樓會成家會長大的人，而且係事業同置業上都已經有一定的發展。相反，另一個極端係完全講樓諗買樓都唔會，我唔係話一定要買到樓先代表乜野，但純粹連講連諗都無，呢下真係令我好驚訝。


作為一個80后，身邊的人都三十出頭，好話唔好聽要玩都玩過，唔理玩唔玩夠，但人慢慢就應該成熟起黎。一個長大同成熟的人，理論上都會開始諗同計劃將來，姑勿論是否有對象同成家立室，但面對住仲有30年的工作同50年以上的人生，如果你手中無握住一D野，人又點會踏實？我相信呢個係一個好正常而又成熟的人的諗法，而當中，當然住屋呢一刻一定又係一個最大的問題，如果你唔打算係一世唔長大諗住成世同屋企住，即永遠都只係做人兒女的話，樓係一個無可避免要去諗的命題。


重申一點，我唔係講緊咩財務自由，唔係講緊你手頭上有幾多錢，唔係講緊買樓收租賺錢的事，我連講話你買唔起要租呢個咁低的線都唔係，我只係純講緊一個（批）三十出頭的人，連樓呢個idea都未係腦裡面萌芽，先係我覺得異常地驚訝。


有時隊長我係現實生活，都會將一D關於樓的信息轉發下比人，正如我係facebook page會將某D外國的樓分享下，其實都只係一個純欣賞的角度出發，又或者我會係某D對話中植入小小樓事的議題去嘗試引領佢地產生興趣。不過不到我不覺得驚奇同無奈的係，我有朋友只係選擇唔吸收個資訊，無論你講乜，話叫佢地陪下我去睇樓，或者參觀下我買左的樓，一概無興趣。而更有朋友係我sent d 香港某特色單位的相時，回覆話"關我叉事"。而"關我叉事"的原因，唔係因為買唔起，而純粹係買樓，甚至樓呢個字，關我叉事！


也許我expect的回應，可能只係話"好靚喎"，或者"買唔起"咁，但到到某D 30幾歲的人都係無idea，呢下真係唔知搞乜。


不過，呢個關我叉事的諗法，同样亦會出現係一些買左樓好又或者租緊樓的couple身上，特別係女仔果方。當然我知香港好多女仔都對樓有所求，但同時又有一批女仔真係堅唔諗唔理，一要計數諗錢的野就推比個男的。當然個男的亦未必一定係理財精英，純粹只靠common sense,又或者uncommon sense去睇個樓同樓市。


無論你係邊一批人都好，只要你屬於以上我提及的人，我都好擔心，因為真係套用番保險人講，你唔理財，財不理你。有人識玩25歲開始諗，40歲都已經收成；但你40歲先諗，可能要臨退休先收成；最大穫的係你幾多十歲都唔識諗，可能你就會提早收皮。