月入十萬又如何?


對於一般市民黎講,月入十萬,年薪已經講緊過百甚至連呢样果样去到百尾二百,係香港都應該肯定係中產或以上的人工,不過有時只係攞一個人工的指標,也許你都好難定論呢個人的財務是否合理。


當然好明顯有無樓係一個主要的問題,但再深入D去研究就應該諗如果有樓的話,一個乜野的樓的組合先係合理?講真,今時今日十皮野一個月,唔係少,但亦唔係話好L多,如果生活得奢侈小小,買樓都唔係一件易事,所以第一個問號就係十皮野月入的人係咪一定要有樓先?


咁又要睇番十皮野一個月的人做左幾年野儲左幾年錢,按供款能力當然你我都唔會懷疑佢供唔起正常的樓,但係如果講要儲首期呢下就難講。始終一個無財商的人,如果佢月入十皮,自不然總會希望買番D咁上下的樓。而所謂的咁上下,我斷估都起碼700-800呎起,甚至去到一千呎或以上的樓,都唔係話咩好過份,無理由一個無財商的人會月入十皮想買個300呎得寶細一住ga ma,都唔襯身份。所以,如果你要買咁上下的樓,今時今日可能要800-1000萬左近先咁講,即你要攞住4-5球的現金先買到,又或者當你買新樓有二按乜春都好,都起碼攞住3球掛。


3球的資金,相當於30個月唔食唔洗,又或者每月儲5萬咁60個月儲出黎,亦即係要儲5年。Well,如果你大洗小小玩下車玩下其他野,可能就等於6,7,8年,我唔可以話月入十皮的人唔有錢,因為佢可能cash on hand都有好多,但問題係佢都好大機會要上街嗌上唔到車,因為如果你無積蓄黎計,要儲夠岩身份的首期,又真係唔係一件易事。


不過又唔好以為儲到首期就搞掂,因為比你儲到,你又係咁易欠銀行5-7球,以供款計目前你都要供2萬到2萬5左右,當然對於十萬月入的你唔係咩大數,但再接下來又要再儲錢的話(假設無通漲先啦),又要儲番三五七年先有番百幾二百萬係手。只係去到呢一度,有一層樓,有番一舊資金,一個無財商但高月入的人,花了十年先叫做搞掂層自住樓,仲未計如果到時儲儲下層樓又升左追唔切的風險(淡友會話跌左賺到應又點計,OK,合理的假設)。


其實點解要講月入十萬呢?因為隊長只係諗如果有份工比你係月入十萬但只係做一兩年的,咁又點?表面上當然係好過癮比你搵到比一般人多的人工,但同時其實比你搵到一兩年錢之后如果你仲係on99的話,咁你銀行除左錢多左之外,對於成個人生的計劃都無乜幫助。好多人好似好勁咁搵好多錢,但對於自己個盤真係零概念,呢下真係好浪費自己應有的能力。


其實一個人收入高,如果識用財商就真係無敵,隊長寫過咁多篇操篇文章,大家都應該知會點玩,煩都講多句,如果係我的話就一定一間一間細價樓咁買,買到三四間后先諗番買間大,話之你同我講咩身份又好咩都好,總之要捱就后生捱,老左我就要享受。最怕就係有D人坐下又一年坐下又一年,與時間為友為敵,只是一念之差而已。


留言

  1. 一直很喜歡隊長寫這些工作生活類別的文章。
    因為我覺得除左教人買細價樓外, 呢類文章其實很有共鳴。

    月入10萬, 可能大部份人會覺得好多, 亦有一部份人會覺得一般, 更可能有少部份人會覺得好少。
    但無論如何, 我想講既係: 月入10萬, 可以代表到D咩呢?
    如果一個人同時打2份工便可以月入10萬, 咁又代表到D咩呢?

    有套電影, 英文叫"In Time", 由Justin Timberlake主演。
    呢套電影帶出左一個message係: 時間 = 金錢。

    其實一個人一生的時間係好有限, 最慘仲要唔知幾時到期!?
    但偏偏小女子有太多野想做, 總覺得時間唔夠。
    因此"跟時間做朋友"變得好重要, 簡直係重中之重!

    我係好早之前已經發現, 當一份人工好高的時候, 其實等於要求你付出相當多的時間 (交稅仲好金!)。
    所以當我工作上爬到去一個我認為恰當好處的位置時, 我便停下來, 努力跟時間做朋友。

    在我努力跟時間做朋友的同時, 我意外得到另一份顧問的工作。
    本打算辭掉目前的工作, 專心另一份, 但抱著"跟時間做朋友"的原則, 我最後選擇辛苦一點。

    很同意你的一句, 月入10萬, 如果是大花筒, 變相與時間為敵。
    我都覺得, 應該趁後生, 捱晒大部份的辛苦, 等年紀大少少先享受。

    回覆刪除
  2. 小女子今年30歲。

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力