讀書叻唔叻又如何

回想番讀書時候的你，有無諗過當年成績好的人，又係咪一定係社會上好成功？而成績普普通通的朋友，又係咪一定係社會上好發展得好一般呢？換句話說，讀書叻係咪就等於一條龍咁三歲定八十呢？


係呢個讀書叻唔叻的基礎上，首先要分開三班人先。A就係讀書叻，所以學歷相對亦會比較高的。B就係讀書唔叻，但又叫做入到U一路讀到上去有番咁上下學歷的。C就係讀書唔叻所以可能就中五中七之后就直接做野的人仕吧。


利申一下，其實隊長真係成績普普通通，但又叫做猛車邊一路讀到上去，學歷上你唔睇成績的話我係"超高的"，不過如果你問我讀左D乜，老實講我可以答你我都唔係好知，去到今時今日，除左基本的語言同加減乘除外，能夠生存同埋有財務智慧，都同我讀書所得黎的智識無乜關係。


不過，你不得不承認有一部份人因為讀書叻而有好美好的將來，原因係佢地係揀U時已經可以有好高自由度咁揀讀醫，讀法律，讀Finance，之后就差唔多保證佢地搵到份工就搵到十皮八皮一路咁上去，只要唔係一個高分低能的人仕，理應呢一班人係的確高人一等或快人一步的。


之但係A呢類學生又係咪一定係我上面誁的讀醫讀法律之后出黎做專業人仕呢？又未必。而就算做到專業人仕，當然起步點可能比你好，不過有時你同呢D人傾計講野，你又發現原來又佢地其實又唔係咁醒，又唔係咁叻。唯一佢地比你優勝的地方，可能就係佢老味係中學果時有超強記憶力將成本書save左入去個腦度，然后又可以print番出黎，而呢一個技能就係我地教育系統下所鼓吹的"成績"，亦因為呢一個技能會設定左你的起跑線，的確係吹L漲。


當然，我相信一定有老師好柒咁問過你，點解人地得，你唔得的類似問題，其實呢個問題等同於我問番老師點解李嘉誠可以白手興家你唔得，又或者spiderman可以噴蜘蛛絲你又唔得咁，一样係唔得就唔得。但反過黎，其實每個人都有D野係叻的，甚至你會發現係香港其實亦有好多所謂的"醒目仔"，轉數超快但係又唔知點解成績唔係咁好，又或者根本讀唔到書而好早就出黎做野。


所以，有部份C類的人，又會發現自己其實又唔係柒，就算一班人坐低傾計講野，以轉數計可能係比AB的人都快好多，不過因為成績學歷問題，就局限左個發展。


其實隊長認為香港的教育制度係廢就全東南亞都知，有好多所謂的醒目仔係呢個制度下已經被廢棄左，從人材上我覺得係對整個香港黎講係有一個好大的損耗。可惜，你睇下而家個教育局由吳SIR帶領，你由一個傻仔去想改變呢個制度，根本就係絕望。


不過，成件事的問題係咁你讀書叻唔叻又點先？當然而家講叻果班，勿論佢地係咪有部份人其實係柒，都已經係保送左做專業人仕或設定係更好的起跑線。但唔叻的你又係咪等於死路一條呢？


如果你係做文職office工的，我成日都同人講你唔會日日帶張成績表番工做人，話之你讀書GPA有幾高或幾低，你做到野就係叻，做唔到野你踩晒屎，幾高成績都無用。所以個人係職場上係唔認同讀書叻唔叻又點的。不過，如果你讀書唔叻又唔好即刻好眉飛色舞咁覺得原來隊長撐你，因為有兩點要注意的係，一般肯用功讀書的人係文書上係真係有優勢，做野睇野係會比較細心的。另一样野係，隊長唔係市場，呢個世界就係有無盡咁多的人用唔同的角度睇野，有D人，如HR，就係只會攞住你個resume黎睇。你不得不承認，有時一班資質低的人痴痴呆呆坐埋一枱，但佢地又衰在位高權重可以定奪你的升降去留，再唔合理的事情都可以出現，如呢家香港政府已經係一個好好的例子。


所以，隊長認為讀書唔駛太叻，但都唔好太柒，你衰衰地免強讀完個U，攞到張畢業證書已經關人隠事，之后呢幾十年好大機會都唔會有人再理你的成績，而判斷你有無料的就係靠你個人的能力。如果無degree的你，現實的情況下衰衰地都要讀番個degree，讀咩唔係好緊，邊間U都唔係好緊要，總之達到最低水平即間U係受認可，你個major求其咩marketing啊HR啊咩都好，咁就OK。


而如果你話我唔係做文職的，即我可能係做D手藝野如廚師，面包師，工程之類的，咁我認為學歷就並非一切，但你要有心去將你識的野越讚越深，越做越叻，越做越精。呢D野又係學歷上無法顯示，但只要你做得好肯用心，慢慢就會化成一種有人欣賞的價值，所以讀書有時叻唔叻又唔係咁重要。


但最后記住讀唔讀得成書唔係問題，做人記得唔好走火入魔就好了.......