誰人能住一千萬以上的樓?

呢個問題，其實都困擾左我好一段時間。


當然，如果你要答呢個問題的話，最容易答的答案咪就係"有錢人"，而有錢人的話當然你可以話包括生意人，CEO，企業高層，醫生，律師之類的專業人仕，又或者係富二代吧。


不過，咁係咪代表一般人就無機會住得起一千萬以上的樓呢？要解答呢個問題，首先當然係要諗下住一千萬樓的資金同成本。


以今日的按揭條例黎計算，一千萬以上的樓最多只可以按五成，即係話一個人要買一千萬的樓，最少要有5球野係手。但買一千萬的樓，其他成本亦相對提高，例如一千萬的樓厘印是375000元，而當你無人減佣，代理佣金就要10萬元。而且，我相信你買得層一千萬的樓，就當你實用800呎（即建築1000-1200呎之類），如果唔係買新樓咁大間屋裝修，50萬都唔係太睇到靚野。綜合以上的基本資金要求，買一層千萬的樓最少要有6球先有得傾。


咁6球又係一個乜野概念呢？假設你唔係一個生意人郁下手都轉幾M幾M咁，要儲6球出黎的話，一個月儲10K就要50年；又或者一個月儲20K就要25年；又或者一個月儲50K就要10年。如果你係一個打工仔搵緊30-50K的，你好大機會都係一個月儲到10-20K的話，咁你要儲的時間係好大機會25-50年之間，仲要希望你儲完的時候層樓唔好升值，換個角度講係一步到位的情況下你都唔駛旨意買到層一千萬以上的樓。


如果你係一對couple計，你地兩個人也許夾埋可以搵60-100K，一個月儲50K，恭喜你，你可能係10年左右就儲到，不過都係希望層樓唔會到時又大升左令你要繼續儲過。但要注意的一點係，你大約人生幾時先可以搵到30-50K，而又係你搵到呢個錢的時候，即可能到你30左右的時間，你能保證你咁有紀律有錢唔會洗左去，又肯定你比如結婚生仔旅行果D唔駛錢嗎？簡單黎講，要一步到位，我認為都係無乜可能。


當然都最后你話你人到40-50歲，一個月收入100-200K的時候，數字上是將會易計好多，我亦唔再探討落去。問題的焦點係在於，如果一個正常人係要花十九幾二十年先可以住到層千萬的樓，咁點解今時今日你行去港島或九龍的豪宅區，仲有咁L多人住得起呢D屋呢？


答案，有無限的可能性，比如話人地一早早期買落，又或者人地炒股賺大錢，又或者人地一家人一齊供一層樓，又或者人地中左六合彩等等，我亦無從考究，因為又係果句，人地點住到係人地的事，亦即關我L事咩？而最重要亦最關鍵的問題係，我點先住到一層過千萬的樓。


老實講，要供一層一千萬的樓，你搞得掂個首期的話，其實供果part唔係太過份。你借500萬分30年還@2.2%都係講緊一個月還19K左右，比起叫你儲600萬出黎一定輕鬆好多，所以你只要比得起首期，理論上供一定唔會係問題。


從邏輯上黎講，上面的推斷印證一样野就係如果你唔係專業人仕，你唔係有咩奇遇中六合彩，你又遇唔上一個03年SARS后的大淡事的話，你要一步到位，理論上係無可能。呢個推論引申出黎就係你要買一千萬的樓，就唔可以一步到位，相信大家亦相當之同意。但隊長的結論如果只係話比你聽由細價樓一層一層換上去，你又會覺得我9吹鬼唔知阿媽係男人咩？


所以，如果你要隊長比一個方法你的話，我唔係會話比你聽一層一層換上去。而相反，隊長係話比你聽，買一層你心目中理想家居的方法只有一個，就係用"時間"去買。對於大部份人黎講，時間都唔係企係佢地果邊，時間係大部份人的敵人，因為要你儲十九幾廿年，每天你都要節衣縮食，又面對引誘，時間拉長左層樓都會放甩你的儲錢速度，所以如果你要得到你層dream house的話，只有令呢個局面逆轉先係皇道。


去到呢度，其實只要有幾層樓的讀者都會明白是什麼一回事。一層一層換上去的話，你賺的只係你儲錢落樓，同細價樓的升幅。不過問題係一層300萬的樓升10%，對比一層1000萬的樓升10%，高下立見，你不斷追緊一個高速的快車，而你的速度始終係追唔上的。而我的建議係，你要不停儲樓，一層300萬后，踩盡油門能夠再買的時候，就買多層300萬的樓，即共600萬的資產。一層600萬的樓，同兩層300萬的樓，最大的分別，就係你可以出租，利用人地的力量，人地的時間去幫你加速。


當你有三四五六七八層細價樓的時間，計數上你會慢慢發現，原來要追一層一千萬的樓唔係一件太難的事。到時的秘訣，就只係需要"等"，等每個月的租金收入進你口袋，等租金升值令你的現金流增加，甚至等細價樓的升值，加上你的人工，你會發現成條戰線係順暢左好多，而時間亦將會成為你最好的朋友。我不敢保證你10年能買到一層千萬的樓，但我深信呢個方法，最起碼能令你一定有機會買到一層千萬的樓，問題只係你能否持之以恆去做而已。