印花稅修訂條例草案

印花稅修訂條例草案下星期將會表決，呢家著眼點係講緊政府是否按辣招可以先執行，后議決的方式去做，即係以后政府話做就做，攞正牌先斬后奏，定係都要按一般的程序先上立法會審批。


其實BSD同DSD都推左大約接近一年，係過去呢段時間香港的樓價的的確確係比呢雙辣招拉停左，可見中原指數大約係120關口爭持左好一段時間，而一手樓亦已經相當之收歛，雖然樓市並非大幅回落，但向上的勢頭已經被強行拉停。


大部份的評論係過去一年，都係指雙辣招影響百業生計，首當其衝的當然係代理行業，好多人過去呢段時間都係食唔飽的，而銀行裝修傢私律司樓的下遊產業亦唔好過，政府印花稅稅收亦大幅銳減，好話唔好聽真係香港一齊杏家產的。當然，你可以話雙辣招目的係想幫人上車，不過問題係過去一年，係有關討論雙辣招的時候，你可以聽到好多phone in打去都仲係小爆689政府的，但你有無聽過一個case係多L謝689政府出招令佢可以安居樂業呢？


鬧爆100次都換唔到10個8個Like，高下本身立見，社會普遍都承認雙辣招係害處多過益處，之不過政府話要非常時期同非常手段，那麼這段非常時期什麼時候先告一段落呢？天唔知地唔知，相信就只有一男子知，可惜，懶理你叫幾多次68狗，香港人並沒有能力做任何野，呢個係一個可悲的現實。


湯文亮係佢個Blog基本上隔日就講雙辣招，講的唔悶，睇的都睇到悶，有時我都已經唔想睇千萬個唔同versions去講同一件事，特別係班政府以一男子為首，其他人講乜都唔聽。之不過，既然下星期就要表決，我亦發下口痕講多小小。


以現實黎講，其實非常時期呢個定義真係任你講，又無日落條款的話，以我自身一男子黎睇，我就認為要先考慮樓價係咪一千萬億年永永遠遠都唔比再升先？如果唔係，咁呢家個出發點係做咩呢？無人上到車又無人得著咁的情況，已經持續左一年，換個角度黎講亦即係話樓價同人工的競賽已經讓左你一年，呢一年的時間除左比好多人儲更多錢外，亦可以預期下一個人工的升幅去計算番冰凍左一年的樓價，實際上以成個社會的元氣去養一年時間的陰，我一男子認為已經係皇恩浩蕩了。


如果，政府認為呢個係一個常態，我倒認為政府提出的直接係一個永久的議案，我相信所有議員一定會反對，但呢家就係個所謂的非常時期搞到個市古L怪怪咁，因此，我希望提出一點係如果通過的話，呢個非常時期可以係好耐好耐，亦即係一男子將更可以任意控制呢個調控措拖。


其實，我明白政府的想法，就係最好等QE完結，加息之際，樓價向下行時就大放水喉，以英雄的姿態救世。不過可惜的係，我更加認為係689的招數可能先搞出個大頭佛隊冧樓市，想借時勢造英雄咁去拖多一兩年，以救香港的姿態去連任，之但係佢呢個英雄也許亦造就一個柒時勢搞到民不聊生咁多年，亦可能會令佢的如意算盤打不響，更陪上香港經濟同你我的飯砵。


所以，我認為議員們，特別係如果你真係著重中產手中一票的話，希望你地會明白香港中產並不是沒有付出，由交稅，政府政策的福利傾斜，以致樓市被追擊，我地都陪上了我們的資產同金錢。如果議員們真係想為香港好，為中產出聲，為香港長線發展有利的話，我認為你們應該將成個議案反對。記住一點，政府已經為香港拖慢左一年的樓價，亦陪上了一年的社會資源，你們如果能真的將議案擱置，相信你將能賺到中產神聖的一票。



http://www.info.gov.hk/gia/general/201304/05/P201304050245.htm
http://www.singpao.com/xw/gat/201402/t20140206_487636.html