[公大政政學會特稿] 大學生上車出路


相信好多大學生,響畢業前都會對前路十分迷茫,所以多多少少十個有十一個,都係會如同工廠般咁去營運自己人生,簡單來講,就係畢業前盡搵offer,畢業后就有咩offer都做住先,然后做過兩三年唔岩就再換工作,到人生三十便同愛人結婚生仔,然后置業。


因此,我可以講百份之九十的人,都唔係好知自己做緊乜,亦沒有任何計劃,更沒有自己一套的思維,大方向只係跟住人地咁行,所以人生的決定唔一定係錯,但岩的決定往往只係一個偶然。


學會的公關比我的題目,係分享比大學生聽,講下如何上車之類云云。我亦思量左下,發覺如果比呢個主題帶住走,背后郤忽略左一套邏輯哲學,故此我用左一個好玄的開場白,目的係帶出正確的思維。


首先,大部份人的思考方式都係以見到人地做到,又無乜點錯的方式去思考,所以畢業一條龍的公式 -- 畢業搵工結婚買樓生仔.....其實係一個沒有計劃的人生。當然,你也許會話我不嬲都係一個好有計劃的人,我計劃左幾歲幾歲做乜,幾歲幾歲做物!但可惜,要有一套完善的思維去支持卻非人人拥有。


具體小小講,先用搵份工為例,搵工的條件不外睇下係做乜野工作,前景如何,公司如何,然后最實在的係人工如何。相對的,你就會諗下,如果一切都好,你或許會努力係呢間公司做野,然后升職加薪,期望有一日更上一層樓。相反,如果公司唔好的,就轉去另一間公司,希望遇到一個可以發揮的地方。但係,時間一轉,假切你突然跳到65歲退休,你也許是公司的一個重臣,但係退下來后又轉歸平靜,思考人生好像除了份工外,都無乜做過太多自己中意的野,為乜?


所以,我不斷提出營運自己的人生係相當於有兩間公司,一間係你打工的公司,一間係你自己的公司。初出茅廬的你,的確要像你現在做的人样,要苦心經營你打工的工作,后生仔捱下世界,對社會做出貢獻是絕對好的。不過,肯捱的你,千萬唔好忘記你仲有一間公司,而呢間公司仲要係乜都無,無資產無盈利,所以你幫你老細捱完后,記得要投資番落你自己間公司度,因為祗有呢一個方法,你的人生先會越走越輕鬆。


理論講完,轉彎入直路就講下上車呢件事。上車的原因,好多人如我上面咁講,都係見人買就買,或者結婚有需要先買,而更有好多人連諗都無諗過要買。不過,對我黎講,買樓上車,只係相當於對我自己人生呢一間公司注入資產,而注入后,自己的公司先會有盈利可言,花左咁多篇幅去講的,就係呢一個簡單到連幼稚園小朋友都識的概念,不過唔知點解有好多人都唔明,只係不停去爭辯平與貴,甚至腦裡面對買樓的概念等於零。


也許你腦裡面而家對買樓仲有一千萬個問號,而肯定當中最多人問的係,而家咁貴點買?或者換個方式黎問,就一係幾時會跌,又或者幾時會升?由於呢篇野有時間性,所以先唔好討論升跌的問題。而且,我更加想提出,你腦裡面所規劃的人生入面,關於樓的篇幅,是否只有上車呢兩個字?如果係,我就更想打破呢個限死你思維的box,因為我希望你會諗下,你人生幾十年,唔好太貪心,但用幾十年換三五層樓番黎,絕非難事,問題只係你識唔識。


如果你問我點解有咁多人買唔到樓上唔到車,而又有一小部份人可以有幾層樓係手,唯一的分別只係思維。買幾層樓係手的人唔等於佢智商係最高,亦唔代表眼光最好。我成日問人一個好重要的問題,就係買樓係咪一個考眼光的遊戲?我相信大部份人潛意識會答係,因為只要你個腦入面係樓有貴同平的考慮的時候,你就會諗樓價遲D會跌,然后就係等低位入市,賺佢一穫金的,所以如果你咁諗,就大事難成。


相反,買樓其實只係一個方法,理論上樓價高低其實跟本無乜所謂,當然我唔會否定平賣就更好呢個常識。之但係,買樓背后的有兩個重要因素先係決定勝負的分野,第一就係買黎做乜,第二就係時間。如果你買黎自住的,靠自己的人工去支持,是很吃力的一件事。相反,買樓收租,等人地幫你供才是王道。而且,關鍵的仲係時間,而時間並非你入市的時間,我所指出的,係你收租的時間。舉個簡單的例,你而家上車買層300萬的樓,每月租到10000蚊,我話之你話呢家間屋貴唔貴先,但我如果拉長30年,假設當中樓價同租金都有升有跌,但你都堅持出租,到最后你收番36 x 10000回來,即360萬,講真,邊有得輸? 而且,你好彩的話,可能用10年20年已經收回成本,所以如果你能夠盡早明白的話,22歲畢業,你選擇25歲置業定35歲置業,效果已經不言而喻。


當然,今日的你可能連份工都未有,其實你連上車計數呢一下都無得計,所以我唔會太過深入去討論。簡單的講,買樓上車的話,緊記市面上有90%按揭,即你用10%就可以了,而且大學生畢業唔好諗住一步登天,而家諗D上車盤,你住港島都唔好介意買新界,因為只有利用"時間"先係王道。不過,大前題的,都係要努力慳錢,因為再點講都好,衰衰地你都要有10%係手,30萬左右的數,每月儲1萬都要30個月,而家討論都係言之尚早,不過如果想了解更多,不彷可以跟蹤我個blog多D。






留言

  1. 30年唔得咪35年囉,無咪40年囉,都唔駛拗

    回覆刪除
  2. 我諗隊長唔係要俾個準確既數你,而係想話你知,買樓放租租金就會成為第二收入,想買多一兩層樓都易啲

    回覆刪除
  3. 有時教人呢D知識就好似同100年前的人講SmartPhone一樣; 佢連發夢都發唔到既野, 佢一就係信你, 一就係唔信你.

    回覆刪除
  4. 你自己掉番轉頭諗番過去30年睇下30年前的樓價同租金, 自己比個答案自己

    回覆刪除
  5. 咁你岩....記得不要買樓.....因為我被你說服及認同你了.....千萬不要做....記得!!!

    回覆刪除
  6. 隊長已經擁有幾間物業, 你要用無可能做到的思維去同佢表達意見(挑機)係一種侵犯
    請你先去做, 真係做唔到至問. 而唔好一步都未行過就係度問這個問那個, 因為呢種行為叫做無誠意, 所以隊長叫做唔好買樓是對的.

    回覆刪除
  7. 我個blog 上一篇文已經有交代儲蓄首期方法, 主要是要靠慳出來, 或趁後生做兼職增加主動收入儲出來, 至於上車問題, 我都說過新界西北170-180萬到可以上車 例如屯門三寶: 麗寶大廈, 寶麗大廈, 利寶大廈, 上了車, 如果個人將來經濟環境好, 可以換好d既樓, 如果個人經濟環境唔好, 退亦可以守, 有間自置屋住, 在香港擁有最少一間唔使供既自住樓十分重要

    回覆刪除
  8. 認同!我都係死慳出來,由住公屋到買居屋,再賣左佢買私樓住!人到四十,過程是辛苦,但最後個物業係自己!是最大得着!

    回覆刪除
  9. 隊長,三百樓想放租都要先儲百五萬,一個月儲一萬都要儲十二年半先可以合法放租!

    回覆刪除
    回覆
    1. i wanna raise this point also ...

      刪除
    2. i mean, otherwise, i hv alread bought one and rented.

      刪除
    3. 係,但有D人唔係咁諗,你懂的 :)

      刪除
    4. 係呀, 放租樓一定要50%首期, 千萬要守法! 哈哈!

      刪除
  10. 粉絲們請不要誤會,我不是來“挑機”,我只是說出樓宇出租有機會涉及大量開支影響回報,更什是選了不合適時機買樓會影響全家感情。大家留言旨在分享已見,無意冒犯。

    回覆刪除
    回覆
    1. 其實個個都無水晶球, 我地都係睇現狀去推論, 覺得上升因素大過趺而去作出相應既投資, 對沖銀紙貶值.....你既考慮都啱, 所以買有風險, 唔買都有風險, 自己去衡量啦....

      刪除
    2. 又係講時機,時機的野你好岩不過又好浪費大家時間。
      換番轉頭呢家乜都唔好講,我問番你將來乜野時間可以買,乜野時間將來唔可以買算啦。

      刪除
    3. 又係timing, 個個都變哂賭神!

      刪除
    4. 好吧,你們全對!我曾遇過亦有上述的經驗都沒用,言多必失!反正都不中聽。倒感謝有人說出自己要衡量買樓風險。想都不必再留言,因為博大霧的理念,還是不一致。我絕對佩服你有專業知識及過人胆識!祝財務盡快自由。

      刪除
  11. 唔一定係挑機,只係覺得無聊。
    等如呢家你係美斯,但我as一個連波都未識踼的人,問你落場踼波危唔危險,會唔會斷腳,會唔會食波餅,會唔會無球會簽,會唔會比人簽左去德甲唔識講德文咁,你自己諗下點答你。

    回覆刪除
  12. 小姐, 其實你知唔知你口中所謂 "物業稅/管理費/差餉..還有家居保險及大大小小的維修費"係幾多呢? 你又計過數未呢? 根本以上你講呢一切理由對大方向都無影響, 所以大家聽到會覺得你challenge緊人, 明未? 無人揸住支槍迫你攸任何事, 你自己的人生唔該自己負責, 無人應份幫你計數.

    仲有, 你問有無咁理想? 梗係無咁理想啦! 你咪唔好做囉.

    回覆刪除
  13. 投資、人生,都是一個計劃,很高興見到你對後輩的這方面引導,讚!

    回覆刪除
  14. 記同認住兩個淫瘋毒誹謗罪人
    老瘋妓SIU苑攸與騙子嫖子瘋子李廣來

    回覆刪除
  15. 好贊成隊長所講, 而家本人都上左車,死儲緊買第二層~ 但身邊總有人潑冷水! 路不同不相為謀~
    呢個世界一樣米養百樣人, 當你娶到好老婆就會話睇你幾時離婚, 當你買左樓就會話睇樓價幾時跌,當你發左逹就會話睇你幾時死....

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力