Magical Saturday

撻訂呢個名詞，對我黎講好陌生，無諗過竟然會發生係我身上，而且仲要係非一般的撻訂。


大家可能會話，喂隊長你竟然撻人訂？你是咪看淡樓市啊？　錯了，我沒有看淡樓市，當然我個投資角度不嬲都係話現階段要de-leverage同埋投資細價樓為主，之但係咁呢次又發生咩事呢？


話說其實我最后一層細價樓終於完成四個月的漫長裝修，好多人包括AA都認為我痴L左線亦唔識計數，因為我花左大約30萬去做呢件事，但最后竟然只係出租。不過內心的掙扎係有的，主要係一來我地呢D有要求的人，實在無法接收收樓回來時間屋有陣up嗅味，而且收樓回來五月左右係租務淡季，果時放左一個多星期想用11000租出都難，但本身亦因為上手租客比緊9500蚊租而我認為太低先收番，不過其實係收樓果一下我堅後悔，咁的樓睇怕都好難租出，或者要大執先得，到最后真係決定大執，都算係唔睇樓買樓的一個教訓。


另一方面，我想去大執的原因亦係一圓自己對設計的夢，雖然大家都知我係一個投資人，但係我內心的深深處都有一股強烈的設計概念成日想爆發，今次亦借助呢個機會一展所長，希望可以令我間屋的價值提升，畢竟到最后我或許要賣走佢，個裝修都會賺得番ge。


如是者一間令我好滿意的屋，入到去我有一種衝動都想搬入去住，不過到最后都放晒盤比果區的agent，亦得到唔少的讚許下，終於上星期中的時候收到一個電話，話有客人有意以13500租，租客兩夫婦都係大公司任職，如是者我聽都公司名都ok情況下就先收了訂。其實內心亦覺得唔錯，因為13500其實已經相當於該屋苑的一個新高的租金，但計一計數其實都唔係太過合理，因為如果普通裝可能都租到12000，咁我30萬裝先收多1500蚊，其實唔太化算，不過話說回頭如果唔裝修可能9500-10000左右租出去，租客肯租平果D又可能質素差D，點都好都應該叫多左3500蚊，一年收多42000，一個contract兩年收多84000，賺唔番晒都叫做ok la。


於是同租客約定星期六見面並簽正約，其間亦有幾個agent打黎，我亦直接了當說經已租出，一心只等待星期六收埋尾數算數。


到星期六早上起身，發現我部Agent專用手機有數個未接來電，並有短訊說有租客願意出更高價錢，基於好奇心的驅使下，我回覆呢個agent的call，並打算只係鳩up一下。Agent亦先問下我是否真係租出，在什麼狀態，我說今日會旻D簽約，不過你個客比高幾多都無用啦，始終我要賠訂賠佣，無乜可能會咁样放棄而租比個你個客。Agent係呢一刻都明白呢D野，但佢就繼續講佢個租客點样點样好，但我就中斷佢的介紹，而直接了當的說，呢家講乜鳩都無用，我話除非個客肯幫我賺兩個月訂，再賠埋佣金先講啦，不過如果賠晒都好，我先收多你500蚊一個月，咁又無意思，搞咁多野真係攞黎搞，所以我求其up個數我話如果佢肯咁賠法，再比我而家的租金多10%左右，咁我就諗啦。


由於我亦要於當日簽約，所以我同佢講話要一個小時內回覆，其實我內心諗住邊有人會咁癲仔呢，而且係我的角度其實我又唔係租唔出，我已經無乜所謂，不過如果有人竟然中意到咁，一來真係引證我係一個好好的designer，二來亦有番一個合理的誘因比我去轉租ge。大約半小時后，Agent竟然打來同我講租客OK，我聽到都不禁內心跳出一句唔L係玩野吓嘩，但Agent話個租客已經攞緊錢，比現金，叫我呢家去收錢簽約，我心諗，屌如果比到咁，咁我無計啦，局撻。


見到個租客，我第一句同佢講，我話我真係替你覺得赤，始終咁幫我賠佣果度去左四皮野ga ma，咁佢同個agent的計數係覺得，我個單位咁靚裝修，又有晒基本的櫃，其實要置的傢私唔多，咪就賠佣果D錢用左黎買傢私囉。呢件事其實都幫番我，始終我都駛撚左成30個落去，佢肯咁計都係好的。


同租客的對話就唔多講了，不過從計數上，租金回報又再度提升上去，而且是次租金亦成為破頂后的再破頂。當我去番第一個租客的Agent撻訂時，佢話都真係不可思議，始終真係撻租呢家科，如果賣樓就有，搶租就真係十幾年第一次聽。


而對我黎講，開心的當然除左有個好租客比個好租金我之外，更令我興奮的係原來我的設計真係有料到，有人竟然好似爭女咁真係比錢出黎爭我的design，感覺堅良好，而呢一個經驗，亦只能用magical來形容。