發展商的博奕

樓市係政府打壓之下，發展商無論從賣樓手法，以致賣樓的對象都大受限制，難聽D講呢個生意好難做，買得起果D人你又唔比我賣，寫錯小小字做錯小小野又又要拉又要鎖，老老實實我係發展商就一地好唔妥個政府。


不過，在位的人一日在位，發展商都吹佢唔漲，唯一可以做的就係一係唔再發展廢事做錯，一係就玩野打你的弱點搞到民怨沸騰，再利用背後人物關係，試圖拉你落馬。當然要拉你落馬唔係一件易事，但當中的博奕手段，慢慢消耗你的民望，發展商絕對有能力同你玩野。


始終，而家CY政府乜都唔做，主打就係要玩壓樓價增供應，奈何今時今日先天性又欠缺土地，後天自己個班底又廢到無朋友，一方面就係咁推地，但另一方面就搞到發展商唔敢賣樓，即係有面粉但無面包，政策混亂，發展商又大條道理話政府出3D政策加一手樓條例，所以唔係佢地唔賣，係根本唔敢賣，咁其實咁样的話，政府推幾多地又有乜用，根本呢家供應直情推到係接近零，呢個政策市真係笑死人。


可能政府班官又會話，總之我不停推地，你地發展商買左坐住就會有壓力，之後就會慢慢有壓力要割價求售。如意算盤就係咁計，但問題係政府你要同地產商玩野搵佢地黎開刀，同時亦要計下大家的籌碼。以目前土地表入面的１８幅地黎計，一個粗略的估算都係值果300-500億左右就可以買起晒，以2010-2011年黎計，長實新地都買左200-300億地，兩間都可以買晒你，仲未計其他地產商，好話唔好聽你推一幅我食一幅，明知你底牌有限，我買晒唔起真係夾爆你個頭都仲得，而你又吹我唔漲，因為係你令到我賣唔到樓，在商言商我無可能生產一D賣唔到的貨品出黎，到時政府會好样衰，無地要跪地求發展商賣，比人綁架都有之。


可能你會話呢個係我的幻想，而我亦承認我係絕對的鳩UP，但鳩UP上黎都有述可尋。其實由Chinchem投到朗平呢塊靚地時我已經覺得有點古怪，再去到將軍澳塊地又係市場下限的低20%投得，我就更加覺得有景轟，試諗下將軍澳塊地咁近新地果幾幅地，有乜理由新地唔肯比好價錢去買？就算新地唔買，長實，新世界，會德豐，南豐呢d都無理由無興趣掛，始終平野實有人有興趣，最多咪市場下限成交，點會市場下限仲低兩成黎成交，咁多發展商都無一間比一個好少少的價，呢件事的背後只有一個原因，就係發展商應該傾掂數，總之一係就唔買流標，一係就賤價買左佢留住D彈藥，務求用最賤價吸晒你政府的土儲，睇你到時點死。


政府方面，佢地可能會認為自己打壓樓市方向正確，發展商出手低，樓價有望回落，但問題係成本低並唔一定人地要平賣，相反人地到時一样賺到盡的時候，政府其實呢家賤賣土地等同於送錢比發展商洗。始終我係發展商亦唔怕同你賤價買入，畢竟睇死你就算唔中間落台，都好難連任，到時我再棒新一任特首，那時限制盡減，一Q賺番呢幾年的本，都未嘗唔係一件樂事。


所以，最近Chinachem以賤價投到地皮，我覺得背後已經表示一定有古怪，我亦預期之後如果唔係大陸發展商高價買地的話，就會係本地發展商賤價吸地，到底係咪好似我咁講，大家就悉目以待啦。