小股災與你

對於好多對股市或投資不聞不問的人，特別係後生的一代，股災好多時都會講一句”關我咩事？”。


不過如果經歷過97的人，哪怕當時你未做野，都應該知道情況有幾差。由97衰到2003年，真係可以話屍橫遍野。故此，股市的起跌實情對我地可謂息息相關。


就以樓市計，好多所謂的專家話地產股跑先於樓價大約半年，所以如果你見到地產股跌，又或股災，就好應該開始諗賣樓。不過所謂的專家之言，由2009年金融海嘯的后現代好像已經不合時宜。或者可能係話個呢段時間無大股災，所以打唔冧個樓市，之但係地產股又真係又升有跌，港股亦有數次的小股災，一下插幾千落黎都有，但樓市就好似食左偉哥咁一样硬淨，所以專家的話未必可信。


而股災又有人話會有人賣樓套現，所以會有人掟樓出黎隊爆個樓市。呢样野又係97-2003就大把，之但係呢幾年由你小家主導的港交所真係可謂一日千里，我相信呢幾年每日都成功趕走一部份客，成交由最高峰每日過千億到呢家有時靜到300-500億，主要原因係成個股市越搞越衰，香港又唔係好，大陸又做假數，搞到個市成日升又升唔起，外圍跌又一齊跌，小股民十個有十一個都係輸錢收場，越來越少人參與，亦表示越來越少資金流入，也等於無資金入去掃高番D被低估的股票，亦無長期的投資資金係度坐住，惡性循環下人人都輸錢，咁呢個人人都輸錢的遊戲又點會多人玩，少左人玩，就少左人輸得金，亦即係少左人需要掟樓，股樓的關連系數減低，所以又係一個樓市硬淨的主因。


不過，如果個股災真係黎得急的話，銀行可能就有壞漲，水喉不足下就收水，投資需求減少下就少左就業機會，然後又少左市場的各類需求，企業盈利又會下降以至虧捐，為左保住盈利以至企業的命脈，就唯有開始炒人，呢D野08年已經有，就如匯豐咁大都會開刀，所以股市唔好經濟唔好，你係有可能無工開，所以點都會有影響的。


當然最近一個月由23800左右急跌至19800，接近4000點，只可以話係一個小型股災，未必會傷到實体經濟，特別係真係捐手的人唔多，所以如果有人唱淡話樓市因此而跌我都覺得係得啖笑。


不過，我比較關心的係MPF的事，因為全香港人的MPF，唔知係今次4000點的小型波幅入面又蒸發左幾多錢。托賴的係我由22500已經轉左去保本基金，至20200果日我就轉番去港股基金，一方面幫下個市唔好跌咁金（哈哈，不過是杯水車薪），而更重要的係我之前提及MPF雖不時轉下倉，一年轉到兩次，每次多賺10個8個%，30年內係好唔野少的。


我唔知個市仲會唔會跌，但我一直認為股市有上有落係必然，反正如果30年后股市都比今天好的話，已我的賣出價又高於呢家10%，買番亦無乜問題？


如果你的MPF都轉左保本的話，不坊係呢段時間撈下底吧。