政府不撤招的原因

立法會討論壓制樓市上升的招數，施永青的部隊聯同其他代理以過千名代理上街抗議，政府的代表副秘書長話政府現階段無撤招的方向，呢件事其實都幾很簡單。


對於幾萬名的代理身計，老實講對CY政府絕對係無乜所謂，你搵唔到食咪轉行囉，你班代理得個一千幾百人，利益上亦因為代理只係企係自身的利益，並非社會公義上，無左道德高地，政府當然會聽聽你要求，但理Q你感受。


政府自己盤算的數，係自己的威望。而家CY政府可謂乜鳩都無做過，番上大陸真係一D政績都無，唯獨係打擊市場，勉強講得上話係拉停左急升的樓價，呢一個係佢上任以來唯一一样值得＂講＂的野，所以佢點都會無所不用其極，莫視社會任何人的利益，而死都要拉停架直衝的馬車，呢個就係CY的唯一可以保住佢皇位的政績。


狹著話樓價飛升令社會不穩的公義前題下，CY其實已經落左好大的賭注，因為佢同時係＂幻想＂幫緊基層上車，而要同既得利益者的業主打對抗，係呢件事上面，其實我更應為香港想爭取真普選會更難，因為如果真係一人一票選特首，幾可肯定CY一定無得連任，所以佢一定係做D野只會討好佢心裡面盤算緊的普選策略對象，呢個先係佢的真正目的。


點都好，而家代理叫政府撤招，我想信CY只會重覆古惑仔入面的東升耀揚的名句”我東升耀揚，一子錯滿盤皆落索”，原因係你諗下如果撤招，那怕或者只係減辣，但樓市即刻應聲爆上，咁到時是否即時加番辣，定還是宣告樓市辣招無效？如果唔爆上就仲大穫，即係承認政府政策落墨有錯，下藥過深，無盤算同估計清楚。而當然如果減辣之後落市要跌都同唔爆上一样，都係藥份太重，只會制造比人挑剔的機會，何必冒險。


故此，我深信CY政府一定無任何撤招的時間表，代理上街申冤與否，只係能夠制造小小聲音，但如果真係想爭取撤招，就必需搵一個比起樓價平穏更大的社會公義黎比CY考慮，如果唔係的話我相信CY一定采你都傻。


相反，我建議政府應該有一個更清晰的日落機制，如果政府堅持係要等新的供應到，咁就要講清楚係幾多為止達標？如果政府係要求樓市跌兩成就撤招救市，咁就講明比如中原指數或乜鳩指數下就會撤招。我的意見或許你話同地產建設商會一样，要求的只係一個日落機制。不過出心就有一點唔同，因為我怕的係CY政府到時又基於其他政治上的考慮，死要面就算達標都唔妥恊，例如話如果個建議係地建會提出，那怕已經到合理時間，佢都唔肯妥恊，以表達佢同地產商劃清界線，到最後就真係攞香港的民生黎較飛，呢個先係怕的。


所以，我認為撤招的可能性係目前係幾乎零，唯一可以撤招的可能，就係CY下台，新政府上任，而呢件事會唔會係未來半年發生，定係大家要捱５年，就睇下大家7月1日的表現了。