中產人生之人生攻略2

之前係人生攻略第一篇提及，要儲錢買樓，但對於好多人黎講呢件事好似仲係好空泛，所以我詳細小小講。


我認為一個人，假設你大學畢業後，就好應該即時計劃買樓。當然還Grant loan 啊，初時搵到自己錢想fing多D我明，但係做人應該好快咁有一個自己的儲錢計劃，因為就算你一個月儲到一萬（對剛畢業的人好難，但只係一個假設），一年都係得十二萬，兩年廿四萬，要買樓都好似有好大的距離。


之但係買樓係咪要咁儲錢法，其實好因人而異，我亦唔想將我的一D旁門左道公開，反正我認為首先要有好清晰的目標盡快買樓，原因係我地成日話人工追唔到樓價，咁既然我地知道呢個事實，點解仲要同佢抗衡呢？換句說話講，你打工就死撚緊，買左樓等樓價升係會快過你打工，所以盡快買樓先係王道。


另一方面，買樓首期呢样野，對於好多人都係好白痴地認為要30%首期，主要原因亦因為大部份未上車的人都無乜經驗，亦無打算買樓，所以之前未必太了解，然後個腦入面都一直都只有聽人地講的30%首期的概念。所以，我直接指出首次上車係可以借90%按揭，即最少10%就可以，而呢個計劃唔限定一定要買新樓，即係你買二手樓（大部份屋苑都OK，但村屋同唐樓除外），都可以借足90%。而以借90%來計，市場上大路的係可以透過HKMC去借按揭保險，呢一個方法你求鳩其行入大部份的銀行都可以做到，但係冷門D的做法可以搵中原財務或者某日資的財務公司去借，息口都唔係差太遠，大前題係最緊要肯借。


所以，解決左入場門檻係10%首期的時候，就要了解下你點搞到筆首期番黎。最直接的當然係自己儲啦，但當然問屋企人借亦係一個方法，或者搵個有錢的另一半亦係一個可行性的方案，總之呢筆10%首期就自己諗。之但係10%首期其實等於幾多錢，呢個先係成篇野的重點。


係我身邊的朋友，好多好多人都有一個好根深蒂固的想法就係要一步到位，呢個一步到位的想法一般會話上車要買港島區，或者一係要買三房兩套，任何又舊又細又遠又乜又柒的野，全部都會被rule out，到最後一般都出現平的你又嫌鳩佢唔買，貴的你又買唔起，之後成件事就會話儲多小小首期先買個好D ge，然後下一年發現樓價又升左，儲多左的錢可能都未必買得番之前嫌鳩棄果Ｄ盤，到最後就即係晒氣。


我認為，一個正常人，應該一開始買樓就同自己講目標係上車，遠Ｄ細Ｄ舊Ｄ唔緊要，最緊要上左車先。所以新界區的細單位，應該係你的第一站。呢個亦係我的經驗，住入元朗約兩年，樓價升了，樓亦供左兩年，工作又穏定左兩年，樓換樓個門檻實際上已經大覆減低，到時你想係元朗搬大點作為第二步，還是搬出九龍但維持細單位，隨便你。但主要的諗法係，趁後生，住遠小小無所謂，比兩三年自己捱下，到你廿六七歲，慢慢經濟又有點基礎再搬出去，果時你已經嬴晒你同期朋友一大段距離了。


而家的我剛完成搬番出九龍呢一步，睇番目前的portfolio，條路已經成左型，慢慢向下走，發達就唔會，但財務自由就總有一天會來臨的了。


請like我的facebook: http://www.facebook.com/CaptainHK80