業主楂番Fit

今日個標題有點江湖味，點解？因為過去呢段時間D A準剩係識賣一手樓，你話二手業主難搞，所以完全盡可能咁唔推，搞到個二手市場靜到仆街，但係4月29日一手樓管制條例實施後，由於大部份發展商要重新步署，而且如果再摶就有機會刑事，所以大行內部都出左通知要做番二手，加緊同業主溝通，所以4月29日之後又到番我地二手業主話事。


其實我本身都一路諗住出一件貨，但係好衰唔衰就真係比尚悅同寓88打到正一正，搞到我果頭D二手成交靜到發癲，局住坐多左幾個月貨。要減價的壓力就無乜，但係都見到由於好兩三個月我屋苑都唔知有無三兩個成交，有好一部份業主都忍唔住減小小價走左貨，從唔好果方面睇，佢地mark低左個平均價，但從好個面睇，市場急走果班業主都走晒，下一輪應該又排到我呢D只係要求市價走貨的業主。


所以下星期我就會準備放鎖匙比代理，希望係五月呢個二手業主比較強的情況下，加快我以市價出貨的機會。不過大家唔好以為我睇淡，實情係我手頭上有太多物業，係舊年九月，舊年十二月以致今年二月我都分別買左幾個唔同的細單位，呢家只係出番一件黎補充一下儲備，大市我都仲係睇好的。


係寫文章的時候，岩岩無線新聞又再指出今年第一季私人住宅落成量大幅減至200個，而施工量又只係得1100個，預期今年全年落成量都係得13000個，呢個數據又多多少少同我之前係真係可以增加供應嗎？指出的一样，獨沽一味推土地出黎係無用的，仲要有相對的工人同埋建築設備的配合先可以真正咁增加供應，否則後果只係會大家鬥比錢搶工人搶機器搶檔期，加上居屋公屋同埋高鉄呢D政府基建又不停起動，結果就係搶高建築成本，到最後又會轉嫁係買家身上，即係隨時又搞高個樓價。但係今時今日如果有人話要輸入外勞以應付龐大的建築需求，李卓人條粉皮仲唔即刻發癲又話要加薪又罷工又呢样果样，到時唔好話一年13000個，隨時一年5000個都無，香港樓價同政治已經綑綁式係埋一齊，想增加供應好難，所以係呢D條件唔改變下，作為業主的我只會繼續睇升。


話明我（業主）話事的時間，除左買賣之外，呢個星期我都幫我朋友的新樓出租，亦深深感受到目前的樓市真係無辨法唔升。事緣係網上的招租，來的香港人實力都係很普通，三幾百蚊都咬得很緊張，當然精明的香港人不嬲都係咁，格價，壓價，然後最好包埋你全新冷氣傢電就最好，不過同一時間，一對大陸的學生，唔講價二話不說放低十二個月租，我同我朋友都呆左，果種爽快果種實力，我地真係無辦法拒絕咁好的offer。


我相信，未來除非CY真係鎖港，否則大陸人就算唔來買樓，都會來香港租樓，租金紀對係有龐大的支持，香港人仲係度計較一千幾百的時間，大陸人仲驚你唔驚租比佢，我作為業主多多少少都有些感慨，因為正正係我話事，感性的我真係想香港人有實力，但理性的我話比我聽有錢無理友唔賺，再者仲要唔駛煩喎，真係完全技術性擊倒。


有得話事我的（業主）只想講我慶幸我無需同大陸人去掙盤，始終係樓市入面，做業主永遠要比起做租客好。呢段時間如果仲有人諗住上車的，我建議真係有稍稍合理的價錢，睇岩就好了，唔好再期待有大規模的減價，因為這是不現實的。


請去like我的facebook: http://www.facebook.com/CaptainHK80