中產人生之中產攻略

琴日講完中產的生活細味，或許你會話，喂隊長你叻極都係話比我聽乜野係唔得姐，咁點先得啊？


套用一個保險佬的理論，其實所有保險的保單都係離唔開兩個意識形態，一係就先甜後苦，一係就先苦後甜，不過我後加左一個都可以叫做唔甜唔苦ge。


搵幾皮野中產的你，面對今日咁冷多的誘惑同洗費，你要問清楚自己究竟我係呢家享受左先，老來就要憂心，定係話你呢家挨小小，到第時有穏定基礎先開始享受呢？再換個角度，如果你月入3萬，你有權洗盡佢黎享受，又有權儲晒佢（理論上姐，實際上無可能），等第時黎享受，呢個係後生的你需要面對的問題。當然，寫呢篇文的前設低能的都知緊係話要先苦後甜啦，所以我好少去旅行，又好少去fine dinning，盡量簡簡單單咁過生活，當然飲野啊買電話呢D都忍唔住，但係適可而止，知自己的承擔能力係必要的。


下一個問題係，咁我儲錢又有乜用先？


作為一個窮爸爸富爸爸的粉餅，再老土都要講，到你有能力時就要開始建造自己的passive income，亦即係你無需自己花時間而又可以得到的收入。但係深入呢個idea時，我係真實世界有時問人有無睇過窮爸爸富爸爸，好多人都話，睇過下啦，講叫人投資，黎黎去去都係果D野啦！！老老賓賓，我唔會去爭辯到底你明定唔明，有睇定無睇過，不過有時知道一個人佢的background之後，你會發現原來佢其實真係無乜吸收過個idea，所以日日都係係度浪費時間。


點解咁講？因為投資呢個字實在太硬膠，有人同我講睇完窮爸爸富爸爸之後，佢開始買股票投資，唔想靠份工一世。是咁的，據我所知，十個散戶買股票九個都係輸錢，淨番果一個就輸到爬係度，香港個股市講堅真係唔係咁岩散戶玩。可能你會話，挑，係隊長你柒姐，我買股票都不知幾撚掂，咁我恭喜你，因為你係十個散戶入面的第十一人，但長時間後，希望你唔會歸番入去我講個十個人入面。


窮爸爸富爸爸最大的特色，係指出投資最好係投資在現金流入面，利用正現金流去不停咁增加財富，達致一天你會財務自由。財務自由的定義係passive income >= 經常性開支，具體你想了解多Ｄ可以參考原著，或者去財叔Blog學下野（打個免費廣告，但我唔識財叔的）。


好啦，其實窮爸爸富爸爸都無話比你聽買股票係唔好ge，只係香港個市況係會令你的財富減少，收息的現金流又唔穏陣，所以如果你想玩股黎財務自由，我諗都可以用hopeless黎形容，而其他的投資產品如期指／黃金／牛熊／期貨／古董等等，要不就同股票大同小異，要不就係連現金流都無，即係你無法估計自己下個月會有幾錢入袋。


所以，係香港唯一最好做的野，就係買樓收租。先勿論你買的樓價升跌，但租金都幾可肯定係計到出黎，加上槓桿效應同埋低息環境，你買層樓收4%租金，減去銀行息率2.15%，你都坐住1.85%的profit一年，一層300萬的樓就一年收5皮幾野，（條數計落去其實賺得應該仲多，但只係參考去粗略計），買樓收租變相每月執幾千銀，供完十年八載，你人工又高D輕輕鬆鬆咁已經供左一大舊，到時手裡面有錢，要不加按再買，要不收番黎自住都叫供少D，點都好，有樓住的你壓力自然比同期fine dinning的人細。


當然如果你能夠運用財技，hold到兩三間屋咁，讓租客隨時間一點一滴咁累積，一個簡單的財務自由人生便會成型，如果你早覺悟，二十出頭就開始呢條路，或許三十出頭的你已經有小成，四十歲前就可以財務自由，到時你有幾十年時間慢慢享受，相比起你同期的朋友，開始為怕失去工作而憂心，為供讓子女已疲於奔命，為家人有個安樂窩而將所有積蓄一炮過買個1000萬的三房單位，然後隨時間一步一步戰戰兢兢咁迎接中年危機，早開窺的你，後面的道路會相對平坦。


人生的安排其實無乜秘密，先甜後苦同先苦後甜，睇你自己點揀。


請去like我的facebook: http://www.facebook.com/CaptainHK80