朗屏360

朗屏360呢個標題，相信好多人會即刻諗到東涌入大佛的360，但實則其實我係故意混淆視聽，因為真正有纜車坐果個叫昂坪360，而朗屏則係位於西鉄站元朗同天水圍的其中一個站，不過如果你唔係住開元朗，好大機會真係唔識。


點解今日講朗屏，因為地鉄會係今個星期四截收朗屏南的意向書，而利申一下，你當我唱好朗屏出貨又好咩都好，我的確係有一層樓係朗屏站，亦係睇好呢區的前景先入市。


話說回頭，其實我舊年summer後因為大市狂升，亦因當是200萬樓下仲係有印花稅的優惠，故此我就去搵下200萬左右的樓仲有咩選擇。其中一個搵樓方式，我就係沿住地鉄沿線去搵，始終香港人食住個地鉄，D樓點样都有番咁上下支持度的。


當時我打開地鉄網站，開左個路線圖出黎，再配以中原的地圖搵樓，沿住地鉄站一個一個搵。基本上藍色的港島線可以唔駛諗，因為200萬的樓係香港果刻應該都可以話係絕左跡。九龍一帶的話，油尖旺全部都係單幢樓，我就盡量避開。九龍東方面就得番得寶細單位可能有，但打落去D A準當時話2.5M都可能無野，所以我都廢事睇。觀塘就同油尖旺一样以單支為主，向西發展的話，深水埗長沙灣又係單支野，葵涌就要上山先有近2M，荃灣MTR附近綠陽早就唔係呢D價，要上到荃灣中心先有2M頭。


東鉄線的話，大圍就得名城同金禧近地鉄，但又唔係呢D價，遠D的金獅都算有2M頭，但就要行十分鐘左近。沙田中心區我有樓，所以2M已經知道係無可能，當時最平都要2.8M，再沿沙田向上行，火炭兩大屋苑肥龍山同埋銀禧亦唔係呢D價，大學又無野賣，再上去到大埔果頭都2.5M後，粉嶺同上水都差唔多，得個搞。當然睇埋D馬鉄同將軍澳支時線，全部都係半新樓或居屋，2M附近又係無野楝。


如是者再向西鉄線打主意，痾屎癲同南昌站呢家乜都無，無野諗，美孚就更加唔會有野揀。去到荃灣西站亦係乜都無，唔駛諗。錦上路則邊就得一堆村屋，又係無屋苑唔玩得過，元朗站我自己住近都唔駛睇，知咩價。地圖再向西行，朗屏得個朗屏村（公屋），無野玩，再入天水圍，嘉湖又係遠地鉄，無興趣。之後兆康就得個叠苬庭，亦要2.5M以上（因為500-600呎起），之後屯門果時就比瓏門搞到慶烚烚，D價跳晒bar咁上，無興趣追價。睇完成所有線路，得番可以揀的算係九龍灣得寶，荃灣中心同埋大圍的金獅花園係有近200萬的樓玩下。


不過唔放鬆我的繼續由屯門向番元朗拉個地圖，突然係朗屏本身無乜選擇的地區下，突然發現左一個貼住個西鉄站的小型屋苑。上網再做下功課，好多時呢個屋苑D人放賣都係寫住零距離，而且放盤量極少。後來我點样好快速地買左個單位，就請參考極速成交。


不過話說回頭，其中一點我選擇朗屏的原因好簡單，就係未來呢區將會大變天。朗屏的南北都已經比幾大發展商插晒旗，將來將會有幾千個單位落成，而我深信呢一區的吸引力一定比起尚悅同寓88好好多，始終佢又夾住元朗的優勢，又有西鉄站上蓋的先天優勢，以當刻的樓價，我認為係低水的。但點都好，呢個故事亦希望帶出有時搵樓的野好睇你自己花多少時間，如果有心的話，或許你會搵到一D滄海遺珠正在等待你的寵幸。


可惜的係屋苑的年齡係有番咁上下，所以唯有靠裝修撘救。但我認為香港成個地鉄網絡都研究過後，以零距離的賠住朗屏站的優勢，將來元朗成個市區成型後，此名不經傳的小屋苑將會有一個幾可觀的升幅。點都好，二百萬買番黎，蝕極都係200萬，但升幅就可能比起當時的其他選擇，有更可觀的回報。


請去like我的facebook: http://www.facebook.com/CaptainHK80