100萬的樓

今日四叔話捐七幅地出黎起一D 100萬樓下免首期的屋，林鄭亦代表政府出面，預期在一個月內會有詳細的計劃。


個人認為呢個世界都離唔開一個道理，就係平野無好，好野無平。


100萬樓下的樓，係新界而家有無呢？我即刻上一上網搵下，發現原來仲有D你連名都無聽過的村屋，竟然有200呎，亦仲係100萬樓下的，我認為呢D村屋可以比到D吞示我地100萬樓下的樓會係點的。


斷九估你無理由100萬樓下比到個700呎單位仲有3房兩套掛，所以起棟一百萬樓下的樓出黎，我估計第一就係個實用面積只係得100-200呎左右，開房式或叻極都係一房無廚房的格局，難聽D講應該只係一間遠D有管理D而又有業權的湯房。


位置上，我相信應該唔會係新界西，因為元朗一帶發展成熟，D地相當有價值。反而新界東北搞多20年都可能未開發，捐東北的地出黎應該大機會好多。好啦，之但係果D地區的7塊地，我唔知個規模有幾大，但係如果你只係每個地盤都係起果500-1000個單位（以200呎一個計其實好細），人又唔係好多，又未去到一個自己小社區，件事有小小似係比人捉你做開荒牛賣豬仔，真係中左伏你都唔知咩事。


試諗下假設你呢家住係流水響一帶，無地鉄，得有限度的巴士／綠van供應，番工時間唔知有無村巴，但九萬幾人一齊爭坐車駁去火車站，你制唔制先？


交通唔方便係一回事，但交通費生活費又另一件事。


遠到PK的地點，開班次比你就一定叫貴D，唔開比你隨時你郁下都幾十蚊的士。百佳惠康呢D隨時欠奉，下下買野你要攞住兩袋百佳撘巴士我諗唔係一個身份高貴的年青業主會做的，所以到最後你可能有一間平的屋，但你的生活費可能會比起住市區高好撚多，一加一減下，唔見得好著數，隨時時間都蝕埋比佢，真係諗下蝕小小樓價比你但又賺番D其他民生的專營權，大數都可能係長做長有。


當然你可能會話，唔會ge，我信四叔，我信林鄭，所以我相信100萬的樓將會有過千呎實用面積，前面無敵大花園，後面有標準泳池的康樂設施！如果係咁的話，我相信呢件貨只係大抽獎比相關買到的首批人仕，有如公屋的概念，但如果真係又方便又靚又大又XYZ的話，你賣100萬時，一轉手就會去番市場價，到最後只不過係幸運大抽獎，而你相信你會係幸運兒嗎？


請去like我的facebook: http://www.facebook.com/CaptainHK80