靜過鬼

又一個禮拜係咁出差，做到人都癲，看來我個Blog同個市一样，都係靜過鬼。


呢段時間新盤就不停吹風不停開，但係報紙就寫到呢家好似冰河時期咁，日曰唔係話咩十大屋苑接近零成交，就係業主冧價賣樓，又或者就係代理行準備結業炒人，總之就係大吹冷風，相當配合政府出招。


不過，為左更貼近個market，我當然都不忘打去同D A準吹下水啦，當然有一部份A準都係牙痛咁聲，呢下係真，但係業主硬淨亦係事實。個別有業主等錢洗要平賣係有，但承接力又真係好鬼，有D地方冧到出血都好似無人接，有D就落少少就即成，真係好難估。


一手方面，發現左有好鬼多超長成交的樓花盤係度賣緊。呢D盤係咁易都二十至三十個月的成交，真係唔係好明咩人會買？收租我買間二手，20-30個月租都收番你二十至三十萬，駛鬼等咁耐咩？而果D咩回贈其實全部都係羊毛出自羊身上之嘛，如果扣減左呢堆野，其實我都同D A準講話呢家市場上的新盤都仲係無乜野值得買。


但點都好，樓市靜咩你話，其實又唔係完全事實。據我所知，細單位好多新盤都仍然係熱賣，如晉嶺呢個盤，個studio差唔多已經比人掃晒，不過傳媒唔講，又或經紀收埋收埋唔話比你知，但你仲會盲中中入去睇摶sell你大單位之嘛。而二手方面都係有咁的情況，以前一賣左一間就慌死人唔知咁上晒星島話邊間邊間又走左創新高，營造賣一間少一間等D人追貨的氣氛。呢家成交左，就收收埋埋唔報上去，真係隠秘到可能隔離位果個都唔知，等到過晒大訂肯定無其他人撩到撻訂先會低調地揚，你睇中原個網呢家幾少將果Ｄ簽左的契（未上地政）放上網就知，總之A準其實都係有心吹下淡風，等個別業主心軟就掟貨出黎，佢地就有生意做。


市靜其實仲有另一個原因，就係一手市場佣金勁高，呢家係咁易都2.5%，有D仲誇到6%佣，再加上發展商唔反價，而且仲同D高層打好關係，四大代理都好幫手，大部份客仔行入間鋪都會比人sell一轉新樓先，所以真係一手搶盡二手市場客源都係真的，最誇張真係要講下我住開的元朗，又寓88又尚悅又爾巒，呢家成個元朗區真係幾乎無人做二手，好彩我真係唔係急出貨，唔係就真係比個濕鳩政府玩撚死。


不過又講番政府，其實呢家真係一個LLL的情況，香港人要買樓果Ｄ仍然買唔到樓，投資者無得買野，業主又企晒係度，外地人又無得買，銀行生意又銳減，代理又無生意，買樓附帶的產業鏈如律司，裝修，傢私，搬運，電子消費產品之類的全部都有影響，就連政府自己的印花稅都無埋，唯一可能受惠的就係發展商都仲叫出到貨，那怕個價就唔可以咁進取，呢個689政府我真係覺得好有問題，如果佢地驚爆破的時候會好大穫的話，我可以話番比你聽，你呢家都搞到好多人無啖好食。


老老實實，我真係希望中央盡快叫689下台，如果唔係香港真係無運行。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431