上車蟹

過去的星期日，差唔多全部都係同樓有關，訓到下午起身，之後就一家人總動員去睇細價樓，之後再去睇我妹上兩個月買左的單位，到最後連夜晚食完飯都收到一個朋友的信息話終於上車了，在此亦恭喜佢執到件荀貨，可以話係有人送錢比佢駛咁劑。


點都好，政府自從出招搞個Double Stamp Duty之後，呢家個市已經係靜過鬼，平時我會比人打爆的電話，都算係一個樓市的探熱針，呢期少左電話，是一件再明顯不過的事。


大市的焦點，當然仲係落係新盤上面，新盤最近打晒仗，一號西九龍又話呢家長實減價，連我老母呢個樓市的大好友本來想入市都終於嚇窒，話買細價盤都要等多個星期睇定D先。在我而言，長實呢個盤話減價，只係一個美麗的誤會，首先呢家先勿論市況，如果一個發展商推盤，如先叫價20000萬一呎，但去唔到貨，同區二手樓就賣10000蚊呎，為左去貨，發展商降到15000呎，咁係咪代表發展商睇唔好後市先？


講真，任何一個盤，唔理市況，都有機會開錯價，開錯價之後相對調整，點解會變左係對後市睇唔好，呢個係一個傻傻地的立論。不過報紙傳媒寫野，最緊要有一個主旨，呢家市況靜，話長實減價去貨，睇唔好後市，一定有selling point，但在我而言，並不成立。


我並非硬好話個市一定唔會跌，但就算要跌，一來我仍然唔覺得會大跌，二來我亦唔覺得就算跌會同長實一號西九龍有關。但係，從我的觀點黎講，我的確係呢一刻要讚政府勁的地方係佢地成功＂雪凍＂樓市。主要原因都係將所有投資／炒家／外來需求全部收皮，留番D樓市小學雞係度等上車，呢D人又比個咁靜的市嚇窒，所以成交呢兩個星期係超少。哪怕就算個市要上，但成交唔mark個破頂價，始終就算業主死叫高價，只要無乜小學雞去追價，個市好難再大升。


亦因為個市已經無乜其他投資／外來需求，市面呢家充斥住一大堆細價新盤，如尚悅，寓88，逸峰，晉嶺等等，呢堆樓盤最大的共通點就係全部細碼到極。如我前面幾篇文所述，呢家細價盤最吃香，所以新盤狂推細價盤，所有代理幾乎全香港都係先幫手推呢堆新盤，簡接隊冧細全香港的二手市場。其實衰D講句，而家政府真係勁似官商勾結，因為只有發展商去到貨，二手業主呢家坐左係度，真係如果發展商去晒貨就跌，政府就真係連逃生門都關埋唔比你就，局你輸。


不過睇番呢家逸峰收票一千張黎計，以400萬樓下的單位最吃香，可以睇到上車的剛性要求仍然強勁，始終能夠200零萬買層樓，呢個機會可能真係可一不可再，所以我聽到呢個價就預期呢個盤一定又係D細單位好快比人食晒。但問題係，呢D人係咩人？我估，九成又係上車客啦，咁上車客買呢D樓盤其實有無認真諗過呢？


曾經我講過，買尚悅的，預左要坐艇一陣，今日我可以話買得逸峰一样要坐艇。簡單講，旁邊綠悠軒都係賣5200蚊左右一呎，佢呢家賣6500蚊左右，其實都貴左兩成幾上去。再睇地點，本來諗番我個Agent同我講話行路10分鐘可到火車站，一睇google map搵番個位，我即刻屌出黎，又係尚悅果D閪野。我相信，無一個正常人以正常速度可以由粉嶺火車站係20分鐘內完成囉，除非你本身係一個埃塞鵝脾亞的跑手，又唔介意日日係咁行，否則個location又係差到無人有。


老實講，尚悅／寓88同逸峰我會話係蟹貨3寶，唔係話佢會唔升，大市升佢都應該會升，之但係人地升50%你先升10-20%就已經夠屌鬼啦。買樓始終要買location，真係呢Ｄ新界偏到咁撚遠的樓，由九龍坐45分鐘車入到火車位再要駁多20分鐘的步／路程，其實真係應該貼二手價賣樓我先覺得抵。如果唔係，我打死都唔會買。


但市況話比我聽，一千張飛入呢D細價盤唔係野少，再加上呢家樓市雪凍，如果樓市唔跌，當呢批細價盤散晒，購買力又累積到一個空間，我深信下一浪或許會爆上得好快。不過下一浪或許要再凍多三幾個月到暑假先有起息。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431